ފަހަތުން އަރައި އޭދަފުށި ބަލިކޮށް ބީއެމްއެލް ނޯތު ރީޖަން ލީގުގެ ކޮލިފައިންގެ ޒޯން ދޭއްގެ ޗެމްޕިއަންކަން ނ. މަނަދޫ ހޯދައިފި އެވެ.
އޭދަފުށީ ފުޓްބޯޅަ ސްޓޭޑިއަމްގައި މިއަދު ހަވީރު ކުޅުނު މި މެޗު 6-5 އިން މަނަދޫ މޮޅުވީ އޭދަފުށި ބޮޑު ލީޑެއްގައި އޮއްވައި ފަހަތުން އަރައިގެންނެވެ.
މެޗުގެ ފުރަތަމަ ހާފުގެ 19 ވަނަ މިނެޓުގައި ގޯލްކީޕަރު މުހައްމަދު ޒަޔާން އަހުމަދަށް ރަތް ކާޑެއް ދެއްކުމުގެ ސަބަބުން 10 ކުޅުންތެރިންނާއެކު ކުޅެ މެޗުގެ ފުރަތަމަ ހާފު ނިމުނުއިރު އޭދަފުށި ވަނީ 1-4 އިިން ކުރީގަ އެވެ.
ދެވަނަ ހާފުގައި މަނަދޫން ވަނީ ކުޅުން ވަރުގަދަކޮށް، މެޗުގެ ފަހުކޮޅު ގާތްގާތުގައި ލަނޑުތައް ޖަހައި ނަތީޖާ ބަދަލުކޮށްލާފަ އެވެ. އެޓީމަށް ރައުފަތު އަބޫބަކުރު އަދި އަމްދާހު އަލީ ކުރެ ކޮންމެ ކުޅުންތެރިއަކު ދެ ގޯލު ޖަހައިދިންއިރު، އަހުމަދު އަލީ ވެސް ވަނީ ގޯލެއް ކާމިޔާބުކޮށްފައެވެ.
މަނަދޫ މޮޅުކޮށްދިން ނިންމާލި ގޯލު މެޗުގެ ފަހު ވަގުތު ކާމިޔާބުކޮށްދިނީ ޚަލަފް އަހުމަދެވެ. މަނަދޫން ދިޔަ ގިނަ އަދަދެއްގެ ސަޕޯޓަރުންގެ މެދުކެނޑުމެއް ނެތް ތަރުހީބަކީ މި އެނބުރި އައުމުގައި އެޓީމަށް ލިބުނު ބޮޑު ހިތްވަރެކެވެ.
މި ކާމިޔާބީއާއެކު މަނަދޫ އާއި އޭދަފުށި ދެން ވާދަކުރާނީ އުތުރުގެ ރީޖަނަލް ކޮލިފައިންގަ އެވެ. ހަނިމާދޫ އާއި ދިއްދޫ ވެސް ހިމެނޭ މި ބުރުގެ މެޗުތައް ކުޅުމަށް ހަމަޖެހިފައިވަނީ “ހޯމް އެންޑް އަވޭ” އުސޫލުންނެވެ.
މި ބުރުގެ ޗެމްޕިއަން ޓީމަށް ދިވެހި ޕްރިމިއާ ލީގުގެ ކޮލިފައިންގައި ވާދަކުރުމުގެ އަގުހުރި ފުރުސަތު ލިބިގެންދާނެ އެވެ.
މި ދެޓީމު ވެސް ދެން ކުޅޭނީ އުތުރުގެ ރީޖަނަލް ކޮލިފައިންގަ އެވެ. މި ބުރުގައި ވާދަކުރާނީ އޭދަފުއްޓާއި މަނަދޫގެ އިތުރުން ހަނިމާދޫ އަދި ދިއްދޫ އެވެ. އަދި ޗެމްޕިއަން ޓީމަށް ދިވެހި ޕްރިމިއާ ލީގުގެ ކޮލިފައިންގެ ފުރުސަތު ލިބޭނެ އެވެ.
