ބޭންކް އޮފް މޯލްޑިވްސް (ބީއެމްއެލް)އިން ފަރުދުންނަށް ލޯނު ދޫކުރާއިރު، 75 އަހަރު ފުރުމާ ހަމައަށް ލޯނު ދޫކުރާ ގޮތަށް ނިންމައިފިއެވެ.
މީގެ ކުރިން އެ ބޭންކުން ލޯނު ދޫކުރަނީ އުމުރުން 60 އަހަރުން ދަށުގެ ކަސްޓަމަރުންނަށެވެ. އަދި 55 އަހަރުގެ ކަސްޓަމަރުންނަށް ވެސް ލޯނު ދޫކުރަމުން އައީ ފަސް އަހަރުގެ ތެރޭގައި އަނބުރާ ލޯނު ދައްކާގޮތަށެވެ.
މިއަދު އެ ބޭންކުން ބޭއްވި ނޫސްވެރިންގެ ބައްދަލުވުމުގައި ބޭންކުގެ ސީއީއޯ އަދި މެނޭޖިން ޑިރެކްޓަރު މުޙައްމަދު ޝަރީފް ވިދާޅުވީ، އެ ބޭންކުން ލޯނު ދޫކުރާ އުމުރު، 75 އަހަރަށް މަތިކުރަން އިއްޔެ ބޭންކުގެ ބޯޑުން ނިންމާފައިވާ ކަމަށެވެ.
ޝަރީފު ވިދާޅުވި ގޮތުގައި، މި ބަދަލު ގެނައުމަށް ބޭންކުގެ ބޯޑުން ނިންމާފައިވަނީ ޚިދުމަތްތައް އިތުރަށް ފުޅާކޮށް، ގިނަ ބަޔަކަށް ފުރުސަތު ދިނުމުގެ ބޭނުމުގައެވެ.
މީގެ ކުރިން އުމުރުން 55 އަހަރުގެ މީހަކަށް ލޯނު ނެގޭނީ 5 އަހަރުގެ ތެރޭގައި ދައްކާ ނިންމާގޮތަށެވެ. ނަމަވެސް މިހާރު 20 ނުވަތަ 25 އަހަރުގެ މުއްދަތަކަށްވެސް ލޯނު ދެއްކުމުގެ ފުރުސަތު ލިބިގެންދާނެއެވެ.
މި ބަދަލާއެކު، އުމުރުން 18 އަހަރާއި 75 އަހަރާ ދެމެދުގެ ކޮންމެ ރައްޔިތަކަށްވެސް ޝަރުތު ހަމަވާނަމަ ބީއެމްއެލްގެ ލޯނުތަކަށް އެދި ހުށައެޅޭނެއެވެ.
ޝަރީފް ވިދާޅުވީ ލޯނު ދޫކުރާ އުމުރު މަތިކުރީ، ވަރަށް ގިނަ ފަރާތްތަކުން ގެދޮރު ގަތުމަށާއި އެހެނިހެން ކަންތައްތަކަށް ލޯނަށް އެދޭތީ ކަމަށެވެ. އަދި މެދުއުމުރުގެ މީހުންނަށް ވެސް ލޯނު ދެއްކޭނޭ މުއްދަތު އިތުރުކުރުމުން ފަސޭހަވާނެ ކަމަށް ގަބޫލުކުރެވޭ ކަމަށް އޭނާ ވިދާޅުވިއެވެ.
”މެދު އުމުރުގެ ބޭފުޅުންނަށް ވެސް އިތުރު ފަސޭހައެއް ވެގެންދާނެ އެ އޮންނަ 20 އަހަރަށް ނުވަތަ 25 އަހަރަށް ދަމާލައިގެން އެ ލޯނު ދެއްކުމުގެ ފުރުސަތު ލިބިގެންދާނެ. އެހެންވީމަ 75 އަހަރަށް މި އުމުރު [މަތިކުރަން] އަޅުގަނޑުމެން ބޯޑުން ނިންމައިފިން.“ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުޙައްމަދު ޝަރީފް
މެދުއިރުމަތީގައި މިހާރު ކުރިއަށްދާ ހަނގުރާމައާ ގުޅުވައި ޝަރީފް ވިދާޅުވީ ލޯނު ދޫކުރުމުގައި އިންޓްރެސްޓް ރޭޓް ކުޑަކުރުމަށް ނުވަތަ ބޮޑު ކުރުމަށް ވެސް ވިސްނުމެއް ނެތް ކަމަށެވެ.
އިންޓްރެސްޓް ރޭޓަކީ ވަރަށް ގިނަ ކަންތައްތަކަކަށް ބެލުމަށްފަހު ކަނޑައަޅާ އެއްޗެއް ކަމަށާއި ވިޔަފާރިތަކާއި އެކި ކަންތައްތައްތަކަށް އިންޓްރެސްޓް ރޭޓް ކަނޑައަޅައިފައި ހުންނާނީ އެކި ވަރަށް ކަމަށް އޭނާ ވިދާޅުވިއެވެ.
މީގެ އިތުރުން ޝަރީފް ވިދާޅުވީ ރިސޯޓުތަކުގައި މަސައްކަތްކުރާ މީހުން ޑޮލަރުން ލޯނު ދައްކާނަމަ ކުޑަ އަގެއްގައި ލޯނެއް ނެގޭނޭ އިންތިޒާމް ވެސް މިހާރު ހަމަޖައްސަވާފައި ވާކަމަށެވެ. އެއީ އާންމު އިންޓްރެސްޓް ރޭޓުން ބަލާނަމަ 1.5 އިންސައްތަ ކުޑަކޮށް ކަމަށް އޭނާ ވިދާޅުވިއެވެ.
އެހެންކަމުން ބޭރު ފައިސާއިން އާމަދަނީ ލިބޭ މީހުންނަށް ކުޑަ އަގުގައި ލޯނު ލިބޭނެ އިންތިޒާމް މިހާރު ހަމަޖެހިފައި ވާނެ ކަމަށް ޝަރީފްވަނީ ވިދާޅުވެފައެވެ.
