ﷲ ސުބްޙާނަހޫވަތަޢާލާ، މުސްލިމުންގެމައްޗަށް ރޯދަ ފަރްޟު ކުރެއްވީ، ކީރިތިރަސޫލާ ޞައްލަﷲ ޢަލައިހިވަސައްލަމަ، މަދީނަތުލްމުނައްވަރާއަށް ހިޖްރަކުރެއްވިތާ ދެވަނައަހަރުގެ ޝަޢުބާންމަހުއެވެ. ރަމަޟާންމަހުގެ ރޯދަ ހިފުމަކީ، އިސްލާމްދީނުގެ ފަސްރުކުނުގެތެރެއިން އެއް ރުކުނެވެ. އެއީ ޢައިނިއްޔަ ފަރްޟެކެވެ. ޢައިނިއްޔަފަރްޟަކީ، އެމީހަކު އަމިއްލައަށް އަދާކުރުމުން މެނުވީ އެމީހެއްގެ ކިބައިން ފަރްޟުކަން ކެނޑިގެން ނުދާނޭ ކަންތައްތަކެވެ. ޢުޛުރަކާ ލައިގެންމެނުވީ، ނުކޮށްދޫކޮށްލައިފިނަމަ ފާފަވެރިވާނޭ ކަންތައްތަކެވެ. އެހެންކަމުން، ރަމަޟާންމަހަކީ، ރޯދައިގެ ސަބަބުން، އެމަހެއްގައި ގިނަގުނަ ދަރުމައާއި ޘަވާބު މާތްﷲ މިންވަރުކުރައްވާފައިވާ މައްސަރެކެވެ. މި މައްސަރުގެ ފުރިހަމަ ދަރުމައާއި ޘަވާބު ލިބިގަތުމަށްޓަކައި، ﷲ ގެ އަޅުތަކުން ގަދައަޅައި މަސައްކަތް ނުކުރަންވީ ސަބަބެއްނެތެވެ. އެންމެހައި އިންސާނުންނަކީ، އެކަލާނގެއަށް އަޅުކަން ކުރުމަށް މާތްﷲ މި ބިމުގައި ލައްވަވާފައިވާ ޚަލީފާވިއްޔާއެވެ. ދުނިޔޭގައި ކުޅަ އެންމެހާ ޢަމަލުތަކަށް ފުރިހަމަޖަޒާ ދެއްވުމަށްޓަކައި ރުޖޫޢަވާނީ،ﷲ ޙަޟްރަތަށެވެ.
ޤިޔާމަތްދުވަހަކީ،އެމީހަކު ދުނިޔޭގައިކުޅަ ހެޔޮޢަމަލަކުން މެނުވީ، އެއްވެސް ފައިދާއެއް ނުކުރާނޭ ދުވަހެވެ. އެދުވަހުގެ ދާއިމީ ނިޢުމަތްތައް ލިބިގަތުމުގެ އުންމީދުގައި، ދަރުމައިން ފުރިގެންވާ މި ބަރަކާތްތެރި މައްސަރުގައި ފުރިހަމަގޮތުގައި އަޅުކަމުގައި ޘާބިތުވެ ތިބޭބަޔަކުކަމުގައި ވަމާ ހިނގާށެވެ. ފާފަފުއްސެވުންއެދި، ﷲގެ ދަރުމައާއި ޘަވާބަށްއެދި ފުރިހަމަގޮތުގައި ރޯދަހިފާ ބަޔަކުކަމުގައި ވަމާ ހިނގާށެވެ!
ކީރިތި މާތްނަބިއްޔާޞައްލަﷲޢަލައިހިވަސައްލަމަގެ އަންނަނިވި ބަސްފުޅު ވިދާޅުވާށެވެ!
( عَنْ أَبِي هُرَيْرَةَ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ” مَنْ صَامَ رَمَضَانَ إِيمَانًا وَاحْتِسَابًا غُفِرَ لَهُ مَا تَقَدَّمَ مِنْ ذَنْبِهِ ” رواه البخاري ومسلم
މާނައީ: މާތްﷲ ރުއްސުންލެއްވި އަބޫ ހުރައިރަތުގެފާނުގެ އަރިހުން ރިވާވެގެންވެއެވެ. އެކަލޭގެފާނު ވިދާޅުވިއެވެ. “ކީރިތިރަސޫލާ ޞައްލަﷲ ޢަލައިހިވަސައްލަމަ ޙަދީޘްކުރެއްވިއެވެ. ރަމަޟާން މަހުގެ ރޯދައަކީ، ފަރްޟެއްކަމަށް އީމާންވެހުރެ، ﷲގެ ދަރުމައާއި ޘަވާބަށްއެދި ރޯދަ ހިފައިފި މީހާގެ އިސްވެގޮސްފައިވާ ފާފަތައް ފުއްސަވައިދެއްވާނެތެވެ.”
