ރ. މަޑުއްވަރީގައި އެއްބަނޑު އެއްބަފާ ދެބޭންގެ ދެމެދުގައ ރޭ ހިނގި ޒުވާބެއްގައި މާރާމާރީ ހިންގައި ވަޅިއަކުން ހަމަލާދީ އެކަކު ޒަހަމްކޮށްލައިފި އެވެ.
މީޑިއާތަކާ ހިއްސާކުރި މެސެޖެއްގައި ފުލުހުން ބުނީ، މަޑުއްވަރީގައި ދެމީހުންގެ ދެމެދުގައި މާރާމާރީ ހިންގި މައްސަލައެއް ރޭ 11:28 ހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.
އެ ހާދިސާގައި ޒަހަމްކޮށްލާފައި ވަނީ އެ ރަށު ބީޗްހައުސް މުހައްމަދު މުއީނެވެ. ކޮއްކޮ އޭނަ އަށް ދިން ހަމަލާގައި ބޮލުގެ ދެ ތަނެއް ޒަހަމްވެފައިވެ އެވެ. މުއީނަށް މަޑުއްވަރީ ސިއްހީ މަރުކަޒުން ފަރުވާ ދިނުމަށް ފަހު މެންދަމު 3:20 ހާއިރު ވަނީ އުނގޫފާރު ހޮސްޕިޓަލަށް ގެންގޮސްފަ އެވެ.
މައުލުމާތު ލިބިފައިވާ ގޮތުގައި ކޮއްކޮ އޭނާގެ ބޭބެއަސް ހަމަލާދިނީ ބޭބެ އަބަދު ފައިސާއަށް ކިޔާތީ އެވެ.
”ބޭބެ އަބަދު ފައިސާއަށް ކިޔާތީ ރުޅި އައިސްގެން ހަމަލާދިން ކަމަށް ވަނީ. އާސިފަކީ މީގެ ކުރިން ވެސް މިފަދަ ރެކޯޑެއް އޮތް މީހެއް. އޭނާގެ ބޭބެއަކީ ވެސް ކުށުގެ ވެށީގައި އުޅޭ ކަމަށް ތުހުމަތު ކުރާ މީހެއް,“މަަޑުއްވަރިން ވާހަކަ ދެއްކި މީހަކު ބުންޏެވެ.
އިސްމާއީލް އާސިފަކީ މީގެ ކުރިން ވަޅިއަކުން މީހަކަށް ހަމަލާ ދިން މައްސަލައެއްގައި 10 އަހަރުގެ ޖަލު ހުކުމެއްގައި ހުއްޓައި، ދޫކޮށްލާފައިވާ މީހެކެވެ.
އެގޮތުން ނޮވެމްބަރު 22، 2019 ގައި ލަނޑާ ނަގަން އުޅުމުގެ ތެރޭގައި މަޑުއްވަރީ، ފެހިއަލި، އިސްމާއިލް ހައްމާދުއާ ދެމެދު އުފެދުނު ދެބަސްވުމެއްގައި އޭނަ އަށް އާސިފު ދޯންޏެއްގެ ތެރޭގައި ވަޅިން ހަމަލާދީ މޫދަށް އެއްލައިލި މައްސަލާގައި 10 އަހަރަށް ޖަލަށް ލާން ހުކުމްކުރީ ސެޕްޓެމްބަރު 2022 ގަ އެވެ.
