އާސަންދަ ސްކީމްގެ ދަށުން އެންމެ ގިނައިން ދޫކުރާ 250 ބޭހެއްގެ އަގަށް ބަދަލުގެންނަން އެންސްޕާއިން ނިންމައިފިއެވެ.
މިކަމާ ގުޅިގެން އެންސްޕާއިން ރޭ ނެރުނު ބަޔާނެއްގައިގައި ބުނެފައިވަނީ، އެ ބޭސްތަކުގެ އަގު ހެޔޮކުރަން ނިންމާފައިވަނީ އެކި ފިޔަވަހިތަކަށް ބަހާލައިގެން ކަމަށެވެ. އެގޮތުން، އަންނަ މަހު އެކަކުން ފެށިގެން 87 ބޭހެއްގެ އަގަށް ބަދަލެއް އަދި އަންނަ މަހު 24އިން ފެށިގެން 126 ބޭހެއްގެ އަގަށް ބަދަލުގެންނަން ނިންމާފައިވާ ކަމަށް ވަނީ ބުނެފަ އެވެ.
އަދި އެއާއެކު ކުރިން އަގުބޮޑުކޮށް ވިއްކަމުން ދިޔަ ބޭސްތަކުގެ އަގު ހެޔޮކުރެވި ބޭހަށް ކުރަމުން ދިޔަ ހަރަދުގެ ތެރެއިން 200 މިލިއަން ސަލާމަތްކުރެވޭނެ ކަމަށް ވެސް އެންސްޕާއިން ބުންޏެވެ.
އަގަށް ބަދަލު ގެނެވޭ ބޭހުގެ ލިސްޓްތައް އެ ތާރީޚުތަކުގައި އާސަންދަ ވެބްސައިޓުގައި އާންމު ކުރެވެމުން ދާނެކަމަށް ވެސް އެންސްޕާއިން ބުނެއެވެ.
އެންސްޕާއިން ބުނި ގޮތުގައި މި ފިޔަވަޅުގެ ސަބަބުން، އަގުބޮޑުކޮށް ވިއްކަމުން ދިޔަ ބޭސްތަކުގެ އަގު ހެޔޮ ކުރެވި، އާސަންދަ ސްކީމްގެ ޚަރަދު ވެސް ކުޑަކުރެވިގެން ދާނެއެވެ. އެގޮތުން، ބޭހަށް ކުރާ ޚަރަދުގެ ތެރެއިން އަހަރަކު ގާތްގަނޑަކަށް 220 މިލިއަން ރުފިޔާ ސަލާމަތް ކުރެވޭނެކަމަށް ބުނެއެވެ.
މި ބަދަލު ގެނައި ނަމަވެސް، ރައްޔިތުންނަށް ހިލޭ ބޭސް ލިބުމުގެ އިންތިޒާމަށް އެއްވެސް ބަދަލެއް ނާންނާނެ ކަމަށާއި، އެ ލިސްޓްގައި ހިމެނޭ ބޭސްތަކުގެ ކޮންމެވެސް އެއް ބްރޭންޑެއް އެސްޓީއޯ ބޭސްފިހާރަތައް މެދުވެރިކޮށް އިތުރު އަގަކާއި ނުލައި ލިބެން ހުންނާނެ ކަމަށް ވެސް އެންސްޕާގެ ބަޔާނުގައި ބުނެފައިވެއެވެ.
އޭގެ އިތުރުން، އާސަންދަ ސްކީމްގައި ރަޖިސްޓްރީ ކޮށްފައިވާ އަމިއްލަ ބޭސްފިހާރަ ތަކުގެ ތެރެއިން އެ ބޭސްތައް ވިއްކުމަށް ރަޖިސްޓްރީ ކޮށްފައިވާ ބޭސްފިހާރަތައް މެދުވެރިކޮށް ވެސް އިތުރު އަގަކާނުލައި ބޭސް ލިބޭނެ އިންތިޒާމު ހަމަޖެހިފައި ވާނޭ ކަމަށް އެންސްޕާއިން ބުނެއެވެ.
އާސަންދައިން ކުރަމުންދާ ބޮޑު އިސްރާފު ކުޑަކުރުމަށް އާސަންދަ އިސްލާޙުކުރުމަކީ މި ސަރުކާރުން އިސްކަމެއް ދީގެން ކުރަމުން ގެންދާ މަސައްކަތެކެވެ.
