އުމުރުން ދުވަސްވީ މީހުންގެ އައިޑީކާޑު އާ ކުރަންނުޖެހޭ ގޮތަށް ބަދަލުކުރުމުގެ މަސައްކަތް ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރު) އިން ފަށައިފި އެވެ.
އައިޑީ ކާޑާއި ޕާސްޕޯޓް މިހާރު ބޭނުންކުރެވޭ މުއްދަތަކީ އެންމެ އެކަށީގެންވާ މުއްދަތު ނޫން ކަމަށް ބުނެ ގަލޮޅު އުތުރު ދާއިރާގެ މެންބަރު އީވާ އަބްދުﷲ ވަނީ މަޖިލީހަށް މައްސަލައެއް ހުށަހަޅުއްވާފަ އެވެ.
އެ މައްސަލަ ދިރާސާ ކުރާ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީގެ މިއަދުގެ ބައްދަލުވުމުގައި ޑީއެންއާރާއި ހަވާލުވެ ހުންނެވި ހޯމްލޭންޑް މިނިސްޓްރީގެ ސްޓޭޓް މިނިސްޓަރު ޔޫސުފް ޢަބްދުލްގަފޫރު ވިދާޅުވީ ކުއްޖާ އުފަންވުމުން ތައްޔާރުކުރާ ފުރަތަމަ އައިޑީކާޑުގެ މުއްދަތަކީ 10 އަހަރު ކަމަށެވެ.
ނަމަވެސް މިހާރު އޮންނަ ގޮތުން ދޮށީ އުމުރުގެ ބައެއް މީހުންގެ އައިޑީކާޑު މުއްދަތު ހަމަވެ، އާ ކުރުމަށް ދަތިތަކާ ކުރިމަތިވާ ކަމުގެ ޝަކުވާތައް ލިބެމުން ދާތީ އުމުރުން 65 އަހަރުން މަތީގެ މީހުންގެ ކާޑުގެ މުއްދަތު ހަމަނުވާ ގޮތް ހަދަން ނިންމާފައިވާ ކަމަށްވެސް އޭނާ ވިދާޅުވިއެވެ.
އޭނާ ވިދާޅުވީ ކާޑުގެ މުއްދަތު އޮންނަ ގޮތުން ދޮށީ އުމުރުގެ މީހުންނަށް ދަތިވާކަން ފާހަގަކުރެވިފައިވާ ކަމަށެވެ.
އޭނާ ވިދާޅުވީ، ފަންނީ ގޮތުން ބަލަން ޖެހޭ ކަންކަން ބެލުމަށް ފަހު، ކަރުދާހެއް ތައްޔާރުކޮށް މިހާރު ކެބިނެޓަށް ފޮނުވާފައިވާ ކަމަށެވެ.
