ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ )އިން ހުޅުމާލޭގައި އިމާރާތްކޮށްފައިވާ 9000 އަކަފޫޓުގެ ސުޕަރމާކެޓް ހިންގުން ރެޑްވޭވްކުންފުނިން ހަވާލުވެއްޖެއެވެ.
އެޗްޑީސީ އިން ބުނީ ހުޅުމާލޭ އެމް3 ބިލްޑިންޑްގައި އިމާރާތްކޮށްފައިވާ ސުޕަމާކެޓް ހިންގުން އެޗްޑީސީއިން ރެޑްވޭވް އާއި ހަވާލުކޮށްފައިވަނީ އެކަމަށް އެދި ހުޅުވާލި ބީލަމުގައި އެންމެ މަތިން ޕޮއިންޓް ހޯއްދެވި ފަރާތަކީ ރެޑްވޭވްކަމަށްވާތީއެވެ.
“މި އިމާރާތުގައި ރަނގަޅު ފެންވަރެއްގެ ސުޕަމާކެޓެއް ހިނގުމަށް ރެޑްވޭވް ޕްރައިވެޓް ލިމިޓެޑަށް މިހާރު ވާނީހަވާލުކޮށްފައި. އިމާރާތުގައި ކެފޭ އޭރިޔާއަކާއިއެކު ރަނގަޅު ޝޮޕިން އެކްސްޕީރިއަންސެއް ލިބޭނެ ގޮތައް ހިނގަން ވަނީ ނިންމާފައި. މިތަން ވެގެންދާނީ ރާއްޖޭގައި މިހާތަނަށް ހުޅުވޭނެ އެންމެ ބޮޑު ސުޕަމާކެޓަށް،”އިމާރާތް ހަވާލުކުރުމަށް ބޭއްވި ރަސްމިއްޔާތުގައި އެޗްޑީސީގެ މެނޭޖިންގ ޑިރެކްޓަރ ސައިމަން ވިދާޅުވިއެވެ.
ސައިމަން ވިދާޅުވީ އެތަން ހިންގަން ރެޑްވޭވްއާއި ހަވާލުކޮށްފައިވަނީ މަހަކު 200000ރ.ގެ ކުއްޔަށް ކަމުގައެވެ.
ރައްޔިތުންގެ މަޖިލީހުގެ އޭދަފުށީ ދާއިރާގެ މެންބަރު އަހްމަދު ސަލީމުގެ ރެޑްވޭވް ކުންފުނިން ބުނީ މިތަން ކުރިއަށް އޮތް 3 މަސްދުވަހުގެ ތެރޭގައި ހުޅުވާނެކަމުގައެވެ. އަދި މިތަނުންވެސް ތަކެތި ވިއްްކާނީ ރެޑްވޭވްގެ މާލޭ ފިހާރަތަކުންވެސް ވިއްކަމުންގެންދާ އަގުގައިކަމަށެވެ.
ރެޑްވޭވް ފިހާރަތައް އާއްމުންގެ މެދުގައި މަޝްހޫރު ވެފައިވަނީ ދިރިއުޅުމަށް ބޭނުންވާ ތަކެތި އެންމެ އަގުހެޔޮކޮށް ގަންނަން ލިބޭ ފިހާރަތަކުގެ ގޮތުގައެވެ.
