ގައުމު ކުރިއަށްދާ މިސްރާބު ބަދަލު ނުކޮށްފި ނަމަ ފަރަށް އެރުން ކައިރިކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މަންބަރު އަލީ ހުސެން ވިދާޅުވެއްޖެ އެވެ.
އަލީ ކުރެއްވި ޓްވީޓެއްގައި ވިދާލުވެފައިވަނީ ތާއަބަދު ދަރަނި މައްޗަށް ދަރަނި ނަގައިގެން ނުވަތަ އެކަށީގެން ނުވާ މިންވަރަށް ފައިސާ ޗާޕުކޮށްގެން ދެމެހެއްޓެނިވި ގޮތަކަށް އިގްތިސާދު ނުހިންގޭނެ ކަމަށެވެ.
ތާއަބަދު ދަރަނި މައްޗަށް ދަރަނި ނަގަިއިގެން ނުވަތަ އެކަށީގެން ނުވާ މިންވަރަށް ފައިސާ ޗާޕުކޮށްގެން ދެމެހެއްޓެނިވި ގޮތަކަށް އިޤުރިސާދެއް ނުހިންގޭނެ. ޤައުމު ކުރިޔަށްދާ މިސްރާުބު ބަދަލު ނުކޮށްފިނަމަ ފަރަށްއެރުން ވަރަށްކައިރި.
— Ali Hussain (@AleeVoice) July 5, 2022
ރާއްޖޭގައި ތަކެތީގެ އަގު އިންތިހާ އަށް ބޮޑުވަމުން އަންނަ އިރު ރައްޔިތުންގެ އަތުން ނަގަމުން އަންނަ ޓެކްސް ބޮޑު ކުރަން ނިންމާފައިވާ ކަމަށް ފިނޭންސް މިނިސްޓަރު އިއްޔެ ވަނީ ހާމަ ކުރައްވާފަ އެވެ.
އެގޮތުން އާމްދަނީ އިތުރުކުރުމަށް މިހާރު ނަގަމުން އަންނަ ވަރަށް ވުރެ އިތުރަށް ޓީޖީއެސްޓީ %4 އަދި ޖީއެސްޓީ ރޭޓު %2 އިން ސައްތަ އަށް ބޮޑުކުރުން ހިމެނެއެވެ.
މީގެއިތުރުން އާމްދަނީ އިތުރު ކުރުމަށާއި ހަރަދު ކޮންޓްރޯލް ކުރުމަށް ފިޔަވަޅު އަޅަން މަޝްވަރާ ކުރަން ފަށާފައިވާ ކަމަށްވެސް މާލީ ވަޒީރު އަމީރު ވިދާޅުވެފައެވެ.
ނަމަވެސް މިހާރުވެސް ރައްޔިތުންގެ ފާޑުކިޔުން އެންމެ ބޮޑަށް އަމާޒުވެފައިވާ، ސިޔާސީ މަގާމުތައް މަދު ކޮށް މަޖިލިސް މެންބަރުންގެ މުސާރަ ކުޑަކުރުން ފަދަ ކަމަކަށް މަޝްވަރާ ކުރުން ހިމެނޭކަމަށް ވިދާޅު ނުވެ އެވެ.
