ޓީޗަރުންގެ މުސާރަ ބޮޑުކުރިއިރު ލެކްޗަރާއިންގެ މުސާރަ ބޮޑުކޮށްފައި ނުވާތީ, މުސާރަ ބޮޑުކުރުމަށް ގޮވާލާ ލެކްޗަރާއިން ހިމޭން އިހުތިޖާޖެއް ކޮށްފިއެވެ.
މި އިހުތިޖާޖުގައި މޯލްޑިވްސް ނެޝަނަލް ޔުނިޔާސިޓީ (އެމްއެންޔޫ) އަދި އިސްލާމިކް ޔުނިވަސިޓީ އޮފް މޯލްޑިވްސް (އައިޔޫއެމް)ގެ މުވައްޒަފުން ބައިވެރިވެފައިވާކަމަށް އެމްއެންޔޫގެ ލެކްޗަރާއެއް ވިދާޅުވި އެވެ.
މި އިހްތިޖާޖަކީ މެއި 1 އިން ފެށިގެން ތައުލީމީ ދާއިރާގައި ހަރަކާތްތެރިވާ މުވައްޒަފުންގެ މުސާރަ ބޮޑުކުރިއިރު އޭގެ ތެރޭގައި ޔުނިވާރސިޓީގެ ލެކްޗަރާ އިން ނުހިމެނޭކަމަށް ސަރުކާރުން ބޭއްވި ނޫސްވެރިންގެ ބައްދަލުވުމުގައި ވިދާޅުވުމާއި ގުޅިގެން ބޭއްވި ހިމޭން އިހުތިޖާޖެކެވެ.
މި އިހްތިޖާޖުގައި މިއަދު ހުރިހާ މުވައްޒަފުންނާއި ލެކްޗަރަރ އިން ވަޒީފާއަށް ނުކުމެތިބީ ކަޅު ހެދުމުގައި އެވެ. އަދި އެ އިހްތިޖާޖުގެ ބައިވެރިން، ތަފާތު ޝުއޫރުތައް ހިމެނޭ ބޯޑުތަކާއި ބެނާތައް ހިފައިގެން އެމްއެންޔޫގެ ކެމްޕަސްތަކުގައި ދަނީ ހަރަކާތްތެރިވަމުންނެވެ.
އިހްުތިޖާޖުގައި ބައިވެރިވި ބައެއް މުވައްޒަފުން ހިފައިގެން ތިބި ބޯޑުތަކުގައި ޔުނިވާސިޓީތަކުގެ މުވަޒަފުން ބާކީ ނުކުރުމަށާއި ޔުނިވާސިޓީތަކުގައި މަސައްކަތްކުރައްވާ ބޭފުޅުންނަކީވެސް ބުރަކޮށް މަސައްކަތްކުރައްވާ ބައެއް ކަމަށް ލިޔެފައިވެއެވެ. އަދި ޔުނިވާސިޓީގެ ލެކްޗަރާއިން ދަރިވަރުންނަށް ކިޔަވައިދެއްވަނީ އެކި ކަންކޮޅުތަކަށް ދަތުރުކުރައްވައިގެން ކަމަށްވެސް މިއަދުގެ އިހުތުޖާޖުގައި ބޭނުންކުރާ ބޯޑުތަކުގައި ލިޔެފައި ވެއެވެ.
މިއީ މުސާރަ ބޮޑުކުރުމަށް ގޮވާލާ ހިންގާ ފުރަތަމަ ހަރަކާތްތައް ފާހަގަކޮށް އެ ލެކްޗަރާ ވިދާޅުވެފައިވަނީ އިތުރު ކަންކަންވެސް ކުރިއަށް ރޭވިފައި އެބަހުރި ކަމަށެވެ.
ޓީޗަރުންނާއި ތައުލީމީ ދާއިރާގެ މުވައްޒަފުންނަށް މުސާރަ ބޮޑު ކޮށްފައިވަނީ މޭ 1 ވަނަ ދުވަހުއެވެ.
ޓީޗަރުންގެ މުސާރަ ބޮޑުކުރިއިރު ލެކްޗަރާއިންގެ މުސާރަ ބޮޑު ނުކޮށް އޮތުމުން އެކަމުގައި އެ ފަރާތްތަކުން މީގެ ކުރިންވެސް ކަންބޮޑުވުން ފާޅުކޮށްފައިވެއެވެ.
މިކަމާ ގުޅިގެން ފިނޭންސް މިނިސްޓަރު އިބްރާޙިމް އަމީރު ރާއްޖޭގެ ބައެއް މީޑިއާތަކަށް މައުލޫމާތު ދެމުން ވިދާޅުވީ, ވަރަށް އަވަހަށް ލެކްޗަރާއިންގެ މުސާރައަށް ބަދަލު އަންނާނެ ކަމަށެވެ.
