ވިޔަފާރިތައް ގިންތިކުރާނެ ގޮތުގެ ގަވާއިދު ނެރެފި

ގަވާއިދުގައި ބުނެފައިވާ ގޮތުގައި ކުދި ފަންތީގެ ވިޔަފާރި ކަމަށް ބަލަނީ މުވައްޒަފުންގެ އަދަދު 6 – 30 އާއި ހަމައަށް ގެންގުޅޭ ވިޔަފާރިތަކަށާއި އޭގެއިތުރުން ޖުމްލަ އާމްދަނީ 500،000 ރުފިޔާ އިން 5،000،000 މިލިއަން ރުފިޔާއާ ހަމައަށް ލިބި ސާފު ފައިދާ 75،000 ރުފިޔާ އިން 750،000 ރުފިޔާއާ ހަމައަށް ލިބޭ ވިޔަފާރިތަކަށް ކަމަށެވެ.

މީގެއިތުރުން މުވައްޒަފުންގެ އަދަދު 31 – 100 އާއި ހަމައަށް ގެންގުޅޭ އަދި ޖުމްލަ އާމްދަނީ 5،000،000 މިލިއަން ރުފިޔާ އިން 20،000،000 މިލިއަން ރުފިޔާއާ ހަމައަށް ލިބި ސާފު ފައިދާ 750،000 ރުފިޔާ އިން 3،000،000 މިލިއަން ރުފިޔާއާ ހަމައަށް ލިބޭ ވިޔަފާރިއަކީ މެދު ފަންތީގެ ވިޔަފާރީގެ ގޮތުގައި ބަލާނެ ކަމަށް ގަވާއިދުގައި ބުނެފައިވެއެވެ.

ގަވާއިދުގެ ދަށުން ވިޔަފާރި ގިންތިކުރާއިރު، ވަކި ވިޔަފާރިއެއްގައި ހިމެނޭ މުވައްޒަފުންގެ އަދަދާއި، އެ ވިޔަފާރިއަކަށް ލިބޭ އާމްދަނީގެ އަދަދާއި، ސާފު ފައިދާގެ އަދަދު، އެއިން ގިންތިއެއްގައި ބަޔާންކޮށްފައިވާ ތިން މިންގަނޑުން ކުރެ މިންގަނޑަކަށް ނުފެތޭނަމަ، އެ ވިޔަފާރި ގިންތިކުރާނީ، މުވައްޒަފުންގެ އަދަދު 40 ޕަސެންޓު އަދި އާމްދަނީގެ ޖުމުލަ އަދަދު 30 ޕަސެންޓު އަދި ސާފު ފައިދާގެ އަދަދު 30 ޕަސެންޓުގެ ގޮތުގައި ކަމަށްވެސް ބުނެފައިވެއެވެ.