ރިސޯޓު ތަކުގައި މަސައްލަތް ކުރާ މުވައްޒަފުންގެ ތެރެއިން ކޮވިޑް ވެކްސިންގެ ދެ ޑޯޒް ފުރިހަމަކޮށްފައިވާ މީހުންނަށް ކަރަންޓީން ވުމަކާ ނުލާ ރަށަށް ދެވޭ ގޮތް ހަދައިފިއެވެ.
އެކަން ހާމަކުރީ ޓޫރިޒަމް މިނިސްޓަރު އަބްދުﷲ މައުސޫމް މިއަދުކުރެއްވި ޓްވީޓެއްގައެވެ.
ރިޒޯރޓު މުވައްޒަފުން ވެކުސިން ފުރިހަމަކޮށް 14 ދުވަސް ވުމުން ޕީސީއާރުޓެސްޓުން ފާސްވެގެން ކަރަންޓީނުވާން ނުޖެހި (މޮނިޓަރިންގަ އޮންނަ ރިޒޯރޓިު/ރަށް ފިޔަވާ ) ރަށަށް ދެވޭގޮތައް ރައީސް ޞާލިޙް ނިންމެވީތީ އުފާކުރަން. ތަފުސީލު އެޗުޕީއޭއިން ލިބުމުން މިނިސްޓްރިން ރިޒޯރޓުތަކަށް އަންގާނެ.
— Abdulla Mausoom (@Mausoom_Maus) July 7, 2021
މައުސޫމް ވިދާޅުވީ ރިސޯޓު މުވައްޒަފުން ވެކްސިން ފުރިހަމަކޮށް 14 ދުވަސް ވުމުން ޕީސީއާރު ޓެސްޓުން ފާސްވެގެން ކަރަންޓީނުވާން ނުޖެހި [މޮނިޓަރިންގައި އޮންނަ ރިސޯޓު އަދި ރަށްތައް ފިޔަވާ] ރަށަށް ދެވޭ ގޮތައް ރައީސް އިބްރާހީމް މުހައްމަދު ސޯލިހު ނިންމެވީތީ އުފާ ކުރައްވާ ކަމަށެވެ. އަދި ވިދާޅުވީ އެކަމުގެ ތަފުސީލު ހެލްތު ޕްރޮޓެކްޝަން އެޖެންސީ (އެޗުޕީއޭ) އިން ލިބުމުން ޓޫރިޒަމް މިނިސްޓްރީން ރިސޯޓުތަކަށް އަންގާނެ ކަމަށެވެ.
މިފަދަ ލުޔެއް ދޭން ނިންމާފައި މިވަނީ މިކަމާއި ގުޅިގެން ރިސޯޓުތަކުގައި މަސައްކުރާ މުވައްޒަފުން އެތައް ޝަކުވާއެއް ކޮށްފައި ވަނިކޮށެވެ.
މިކަމާއި ގުޅިގެން އެޗްޕީއޭ އިން އަދި އެއްވެސް ހާމައެއް ނުކުރެއެވެ.
އެހެންނަމަވެސް މިއަދު ރައީސުލްޖުމްހޫރިއްޔާގެ އޮފީހުން މެންދުރު 2:30 ގައި ބާއްވާ ނޫސްވެރިންގެ ބައްދަލުވުމުގައި އިތުރު ބައެއް ލުއިތައް އިއުލާން ކުރާނެއެވެ.
މިހާރު އެޗްޕީއޭ އިން ކަނޑައަޅާފައިވާ ގޮތުން ނަމަ ވެކްސިންގެ ދެ ޑޯޒު ފުރިހަމަކޮށްފައިވާ ފަރާތްތަކަށް އަދި އެއްވެސް ލުޔުއް ދޭން ނިންމާފައެއް ނުވެއެވެ. އޭގެ ބަދަލުގައި ލުއި ދޭން ނިންމާފައިވަނީ ކޮވިޑް ޖެހި ރަނގަޅު ވެފައިވާ މީހުންނަށެވެ