އުރީދޫ މޯލްޑިވްސްގެ ފިކްސްޑް ލައިން ކަސްޓަމަރުންނަށް ދުވާލަކު ފަސް ޖީބީ އިންޓަނެޓު ހިލޭ ދޭން ނިންމައިިފި އެވެ.
އުރީދޫ މޯލްޑިވްސް އިން ބުނީ ހަލުވިކަމާއެކު ފެތުރެމުން އަންނަ ކޮވިޑް-19 އާއި ގުޅިގެން އާންމު ދިރިއުޅުމަށް ގޮންޖެހުން ތަކެއް ދިމާވަމުންދާ ކަމަށެވެ. އެހެންކަމުން ގޭގައި ތިބެގެން މަސައްކަތް ކުރުމަށާއި، އިންޓަނެޓް މެދުވެރިކޮށް ކުދިންގެ ކިޔެވުން ކުރިއަށް ގެންދިޔުމަށް މަޖުބޫރު ވެފައިވާތީ މި ދަތިތަކަށް ލުއިކަމެއް ގެނެސް ދިނުމުގެ ގޮތުން ސަރުކާރުން ނަންގަވާފައިވާ އިސްނެގުމާއި އެއްގޮތުގެ މަތިން، އެ ކުންފުނީގެ ސުޕަނެޓް ކަސްޓަމަރުން ނަގާފައިވާ ޕްލޭން އަށް ހަމަޖެހިފައިވާ ޑޭޓާ ހަމަވުމުން، ކޮންމެ ދުވަހަކު 5 ޖީބީ ޑޭޓާ މުޅިން ހިލޭ ދޭން ނިންމާފައިވާ ކަމަށެވެ.
އެ ކުންފުނިން ބުނީ މި އޮފާގެ ގެ މަގްސަދަކީ ކަސްޓަމަރުންނަށް އިންޓަނެޓް ބޭނުންކުރުމުގައި އަން ލިމިޓެޑް ތަޖުރިބާއެއް ދިނުން ކަމަށެވެ. މިގޮތުން، ހަމަޖެހިފައިވާ ޑޭޓާ ހުސްވުމާއެކު، ކުޑަ ވަގުތުކޮޅެއްގެ ތެރޭގައި ހިލޭ ޑޭޓާ އެލަވަންސް އެކްޓިވޭޓް ވާނެ ކަމަށެވެ.
އެހެންކަމުން މެދުކެނޑުމެއްނެތި އިންޓަނެޓްގެ ހިދުމަތް ކަސްޓަމަރުންނަށް ފޯރުކޮށްދެވޭނެ ކަމަށާ ސުޕަނެޓް ކަސްޓަމަރުން ނަންގަވާފައިވާ ޕްލޭންގެ ޑޭޓާ އެލަވަންސް ބޭނުންކުރެވުމާއެކު، 5 ޖީބީ ގެ އެލަވަންސް ކޮންމެ 24 ގަޑިއިރުން އެއް ފަހަރު އަލުން އެކްޓިވޭޓްވެގެން ދާނެ އެވެ. މި އެލަވަންސްއަކީ ކޮވިޑް-19 އާއި ގުޅިގެން ސުޕަނެޓް ކަސްޓަމަރުންނަށް ތައާރަފް ކޮށްފައިވާ 25 ޕަސެންޓް ހިލޭ ލިބޭ ޑޭޓާ އެލަވަންސްގެ އިތުރުން ލިބޭ އެލަވަންސް އެކެވެ. މި އޮފާ އޭޕްރިލް މަހުން ފެށިގެން ކަސްޓަމަރުންނަށް ލިބޭނެ ކަމަށް އެ ކުންފުނިން ބުނެ އެވެ.