ފީފާގެ އެހީގައި އަތޮޅު ތެރޭގެ 18 ރަށުގައި އަޅާ ނެޗުރަލް ގްރާސް ފުޓްބޯލް ގްރައުންޑް ޕްރޮޖެކްޓްގެ ތެރޭގައި ބ.އަތޮޅުން އޭދަފުއްޓާއި ފެހެންދޫ ހިމަނައިފިއެވެ.
އިއްޔެ އެފްއޭއެމްގެ ރައީސް ބައްސާމް އަލީ ޖަލީލު ކުރައްވާފައިވާ ޓްވިޓެއްގައި ވިދާޅުވީ ދަނޑު އެޅުމަށް ހަމަޖެހިފައިވާ ރަށްތަކުގެ ބިންތައް ކަނޑައެޅި، ހުއްދަ ލިބުމާއެކު މަސައްކަތް ފަށާނޭކަމަށެވެ.
“ދަނޑުތައް އަޅަން ރަށްތައް ހޮވާފައި ވަނީ، 2017 އަދި 2018 ވަނަ އަހަރުގެ މިނިވަން ޗެމްޕިއަންޝިޕްގެ އެންމެ މޮޅު ޓީމުތަކަށް ބަލާފައި. މީގެ އިތުރުން ދެރަށެއް ހިމަނާފައިވާނެ، ފުޓްބޯޅައިގެ މުސްތަގުބަލަށް ބަލާފައި އެރަށްތަކުން އެދިގެން،” ކޮންމެ އަހަރަކުވެސް ވިނަ ދަނޑުއެޅުމުގެ މަސައްކަތް ކުރިއަށް ގެންދާނޭ ކަން ހާމަކުރަމުން ބައްސާމް ވިދާޅުވިއެވެ.
އެފްއޭއެމްގެ ޖެނެރަލް ސެކްރެޓަރީ ހުސައިން ޖަޒާވް، ސަން އޮންލައިން އާ މި ވާހަކަތައް ހިއްސާ ކުރަމުން ވިދާޅުވީ ވިދާޅުވީ، ނެޗުރަލް ގްރާސް ފުޓްބޯލް ގްރައުންޑް ޕްރޮޖެކްޓްގެ ދަށުން މިހާރު އިއުލާނުކުރެވިފައިވާ 18 ރަށަކީ، މިނިވަން ޗެމްޕިއަންޝިޕްގެ ޗެމްޕިއަންކަން ހޯދައިފައިވާ، އަދި އެ މުބާރާތުގެ ކާމިޔާބީއަށް ބަލައިގެން އިޚްތިޔާރުކުރެވިފައިވާ ރަށްތައް ކަމަށެވެ.
“އަޅުގަނޑުމެން ވާނީ، މީގެ ކުރިން މިކަން އިއުލާނުކޮށްފައި. އެއީ މިނިވަން ޗެމްޕިއަންޝިޕްގެ ކާމިޔާބީ ހޯދާ ރަށްތަކަށް ފުޓްބޯޅަ އިންފްރާސްޓްރަކްޗަރތައް ގާއިމުކޮށްދިނުން. 2016، 2017ގައި އަޅުގަނޑުމެން ވާނީ، ޗެމްޕިއަން ޓީމުތައް ނިސްބަތްވާ ރަށްތަކަށް ޗޭންޖިންގ ރޫމް ހަދާދީފައި،” ޖަވާ ވިދާޅުވިއެވެ.
އޭނާ ވިދާޅުވީ، ކުރިއަށް އޮތް ތަނުގައިވެސް، ރާއްޖޭގެ ފުޓްބޯޅައިގެ އިންފްރާސްޓްރަކްޗަރ ވަރުގަދަކުރުމަށް އެފްއޭއެމުން ތަފާތު މަޝްރޫއުތައް ހިންގާނޭ ކަމަށާއި އަދި އިތުރު ރަށްތަކުގައި ވިނަ ދަނޑުއެޅުމުގެ މަސައްކަތްވެސް ކުރިއަށް ގެންދާނޭ ކަމަށެވެ.
