ބ.އަތޮޅަށް ޚިދުމަތް ކުރާ ފަރާތްތަކުގެ އަގު ވަޒަން ކުރުމުގެ ގޮތުން ބ. އަތޮޅު ކައުންސިލުން ތައާރަފް ކޮށްފައިވާ ރަންނާ އެވޯޑް މިއަހަރު 15 ފަރާތަށް ލިބިއްޖެއެވެ.
މިރޭ ބ.އަތޮޅު ތައުލީމީ މަރުކަޒުގައި މިކަމަށް ޚާއްސަކޮށް ބޭއްވި ރަސްމިއްޔާތު ޝަރަފްވެރި ކޮށްދެއްވާފައިވަނީ ސިވިލްސަރވިސް ކޮމިޝަންގެ ރައީސް ޑރ. އަލީ ޝަމީމެވެ.
ރަންނާ އެވޯޑުގެ ޝަރަފްވެރިކަމުގެ އެވޯޑް ދެ ބޭފުޅަކަށް ލިބިވަޑައިގަތްއިރު ހިތްވަރު ދިނުމުގެ ރަންނާ އެވޯޑް 13 ބޭފުޅަކަށް ލިބިވަޑައިގަތެވެ. ޝަރަފްވެރިކަމުގެ އެވޯޑު ލިބިފައިވަނީ ، އިޖްތިމާއީ ޚިދުމަތުގެ ދާއިރާއިން އޭދަފުށީ ހަތިހާ ޢަބްދުއްސައްތާރު ޢަލީ އާއި ތަޢުލީމީ ދާއިރާއިން ކުޑަރިކިލު، ހަޒާރުމާގޭ، ޢަބްދުލްޙަމީދު އާދަމް އަށެވެ.
މީގެ އިތުރުން މަތީ ދަރަޖަ ހާސިލުކޮށްފައިވާ ފަރާތްތަކަށާއި ސާނަވީ/މަތީ ސާނަވީ އަދި ކުޅިވަރުގެ ބައިން ވަނަތައް ހޯދައިދީފައިވާ ފަރާތްތަކުގެ އިތުރުން ބ. އަތޮޅަށް އެންމެ ޚިދުމަތްތެރި ރިޒޯޓަށާއި އެންމެ ހިންގުންތެރި ކައުންސިލްތަކަށާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީއަށްވެސް އެވޯޑްދީފައި ވެއެވެ.
