މިއަހަރު މިސްރުގައި ބާއްވާ ބައިނަލް އަގްވާމީ ގުރުއާން މުބާރާތެއްގައި ރާއްޖޭގެ ފަރާތުން ބައިވެރިކުރާ ދަރިވަރަކަށް އޭދަފުށީ ޖަންބުމާގޭ މުހައްމަދު މުސްތަފާ ހޮވައިފިއެވެ.
މި މުބާރާތަށް މުސްތަފާ ހޮވާފައިވަނީ މުބާރާތުގައި ވާދަކުރާނެ ބައިވެރިއަކު ހޮވުމަށް ކީރިތި ގުރުއާނާބެހޭ މަރުކަޒުން ކުރި އިއުލާނާ ގުޅިގެން ކުރިމަތިލީ ކުދިންގެ ތެރެއިން އެންމެ ރަނގަޅު ބައިވެރިއެއްގެ ގޮތުގައި ހޮވިގެންނެވެ.
މުސްތަފާގެ މި ކާމިޔާބީއާ ގުޅިގެން އިސްލާމިކް މިނިސްޓަރ ޑރ. އަހްމަދު ޒިޔާދު ވަނީ އޭނާއާއި އާއި ބައްދަލު ކުރައްވައި ތަހުނިޔާ ކިޔާފައެވެ.
މުސްޠަފާގެ އާއިލާގެ ބޭފުޅުން ނާއެކު އިސްލާމިކް މިނިސްޓްރީގައި އޮތް މި ބައްދަލުވުމުގައި މިނިސްޓަރ ޒިޔާދު ވަނީ މިމުބާރާތުގައި ރާއްޖެ ފަޚްރުވެރިވާ ފަދަ ވަނައެއް ހޯދުމަށް ގަދައަޅައި މަސައްކަތްކުރުމަށް ހިތްވަރު ދެއްވައި ނަސޭހަތްތެރިވެ ވަޑައިގެންފައެވެ.
އުމުރުން 12 އަހަރުގެ މުސްތަފާ ވަނީ މިދިޔަ އަހަރު ކީރިތި ގުރުއާން ހިތުދަސްކޮށް ހާފިޒުކަމުގެ ސަނަދު ހާސިލުކޮށްފަ އެވެ.
އޭނާ ވަނީ މިދިޔަ ރޯދަމަހު އޭދަފުއްޓާއި ބ.އަތޮޅުގެ ބައެއް ރަށްރަށުގެ އިތުރުން ރ.އަތޮޅުގައިވެސް އިމާމުވެ ތަރާވީޙް ނަމާދުކޮށްގެން އެތައް ބައެއްގެ ސަމާލުކަން ހޯދާފަ އެވެ.