ކުރިޔަށްއޮތް ދެދުވަހުވެސް ބ. އަތޮޅުގެ ރަށްރަށަށް ވިއްސާރަވެ، މޫސުން ގޯސްވާނެކަމަށް ލަފާކުރެވޭކަމަށް މީޓިއޮރޮލޮޖިކަލް ސާވިސަސް (މެޓް އޮފީސް) އިން ބުނެފިއެވެ.
މެޓްއޮފީހުން މިހެންބުނެފައި މިވަނީ މިއަދު ހެނދުނު ބ.އަތޮޅުގެ ބައެއް ރަށްރަށަށް ގުގުރުމާއެކު ބޯކޮށް ވިއްސާރަވެހި އަދި ކަނޑުގަދަވެ ދަތުރުފަތުރަށް ބުރޫއަރާފައި ވަނިކޮށެވެ.
އީވީއަށް މައުލޫމާތު ދެމުން މެޓްއޮފީހުން ބުނީ ހުޅަނގުގެ ވިއްސާރަވިލާތަކުގެ އަސަރު އުތުރަށް ކުރާނެކަމަށް ބެލެވޭއިރު، ވިލާގަނޑުގައި ކަނޑުތައްވެސް ގަދަވުން އެކަށީގެންވާކަމަށެވެ. އެއިދާރާއިން ބުނީ އާންމުގޮތެއްގައި ވައިޖެހޭނީ 5 މޭލާ 15 މޭލާ ދެމެދުންނަމަވެސް ވިލާގަނޑުގައި ގަޑިއަކު 40 މޭލަށް ވައިގަދަވާނެކަމަށް ލަފާކުރެވޭ ކަމަށެވެ.
ރާއްޖޭގެ މޫސުން ކުރިޔަށް އޮތް 24 ގަޑިއިރު ގޯސްވެދާނެކަމަށް ދަތުރުވެރިން ސަމާލުވުމަށް ކޯސްޓްގާޑުން މިއަދުވަނީ އިލްތިމާސްކޮށްފައެވެ.