ރިސޯޓެއްގެ ގޮތުގައި ތަރައްގީ ކޮށް އަންނަ އޮކްޓޯބަރ މަހު ހުޅަވަން ތައްޔާރު ވެފައިވާ ބ. ވައްކަރުގައި މަސައްކަތްކުރާ ބިދޭސީއަކު ހިފަހައްޓައި އަނިޔާ ކޮށްފިއެވެ. މިކަން ހިނގާފައިވާކަން ޔަގީންކޮށް ދެމުން ފުލުހުން ބުނެފައިވަނީ އިއްޔެ ހަވީރު މިކަމުގެ މައުލޫމާތު ލިބިފައިވާކަމަށާއި މައްސަލަ މިހާރު އަންނަނީ ތަހުގީގު ކުރަމުންކަމުގައެވެ.
އަނިޔާ ލިބުނު ބިދޭސީ މީހާ މިހާރުވަނީ ފަރުވާއަށް ފަހު ދޫކޮށްލާފައިކަމަށާ މައްސަލައާ ގުޅިގެން މިހާތަނަށް ތިން ބިދޭސީ އަކު ހައްޔަރު ކޮށްފައިވާ ކަމަށް ފުލުހުން ބުނެއެވެ.
ބ.ވައްކަރު ރިސޯޓުގައި އެކި ކެޓަގަރީގެ 135 ވިލާ ހުރެ އެވެ. އޭގެތެރޭގައި 43 ވޯޓާ ވިލާ އާއި 24 ބީޗް ވިލާ އާއި 10 ވޯޓާ ފެމެލީ ވިލާ ގެ އިތުރުން ޕޫލާއެކު 20 ބީޗް ފެމެލީ ވިލާއާއި ޕޫލާއެކު 5 ބީޗު ސުއިޓު، ޕޫލާއެކު 2 ބީޗު ފެމެލީ ސުއިޓް އަދި 12 ބީޗް ބަންގަލޯ ހުރެ އެވެ. އޭގެ އިތުރުން އަށް ރެސްޓޯރަންޓް އާއި ބާރ ހުރެއެވެ.