މަޑުޖެހިފައިވާ އޭދަފުށީ މަގުތައް ތާރުއަޅައިގެން ހެދުމުގެ މަސައްކަތަށް އިތުރު މުވައްޒަފުންނާ، ވެހިކަލް އިތުރުކޮށް މަސައްކަތުގެ ސްޕީޑް އަވަސްކޮށްފިއެވެ.
ރަމަޟާންމަހަށް މަޑުޖެހުނުގޮތަށް މަސައްކަތް ބާރު ސްޕީޑްގައި ފެށުނީ މިހަފްތާގެ ތެރޭގައިކަމަށް އެމްއާރުޑީސީ އޭދަފުށީ އޮފީހުން ބުނެއެވެ. ސައިޓް މެނޭޖަރ އަހްމަދު ބަޝީރު އީވީއަށް ވިދާޅުވީ ރޯދައިގެ ފަހުން މަސައްކަތް ފެށިއިރު މަސައްކަތް ބާރަށް ކުރިޔަށް ގެންދިއުމަށް މަގުފަހިވީ މަގުކޮނުމަށް އިތުރު 10 ލޭބަރުންނާއި، އިތުރު ވެހިކަލްތައް ލިބުމުގެ ސަބަބުން ކަމަށެވެ. އޭނާ ބުނީ ޖުމްލަ 20 ލޭބަރުން ކޮންމެ ދުވަހަކުވެސް މަސައްކަތް ކުރަމުންދާއިރު އެކްސްކަވޭޓަރުގެ އެހީގައި މަގުކޮނުން އިތުރަށް އަވަސް ވެގެން ދާކަމަށެވެ.
“ކުރިން ތިބީ 7 މުވައްޒަފުން. 20 ވީމަ ވަރަށް އަވަސް މިހާރު ކޮނުން. އަނެއްކާ ހައިމާކް ބޭނުންކުރެވޭ ދިމާތަކުގައި އޭގެބޭނުން ކުރަމުން މިދަނީ. މިހާރު ދެންނެވޭނީ މަސައްކަތް ވަރަށް ބާރަަށް ގެންދެވޭނޭ. ވެހިކަލްވެސް އެބަހުރި ބޭނުންވާވަރަށް ” ބަޝީރު ވިދާޅުވިއެވެ.
ބަޝީރު ވިދާޅުވީ އޭދަފުށީގެ މަގުތަކަކީ ވަރަށް ގިނަ ކޭބަލް ވަޅުލާފައިވާ މަގުތަކެއްކަމަށާ، މަސައްކަތް އަވަސްކުރުމަށް އެންމެބޮޑު ދަތިކަމަކަށް މިމައްސަލަ ކުރިމަތިވާކަމަށެވެ.
“ހައިމާކް ބޭނުންކޮށްގެން ކޮނެވޭނަމަ މިހާރު މިމަސައްކަތް ވަރަށްބޮޑުބައި ނިމިދާނެ. އެހެންނަމަވެސް މިރަށުގެ މަގުތަކަކީ ވަރަށް ގިނަ އަދަދަކަށް ކޭބަލް ވަޅުލާފައިވާ ރަށެއްވީމަ އެކަން އެހެން ކުރެވެން ނެތީ. އެހެންނަމަވެސް ހައިމާކް ބޭނުން ކޮންމެވެސް ވަރަކަށް ކުރާނެ މަގުކޮންނައިރު”
އޭދަފުށިގެ 15 މަގު ރަނގަޅު ފެންވަރަކަށް ތާރު އަޅައިގެން ހެދުމަށް އެމްއާރްޑީސީ އާ ހަވާލުކޮށްފައިވަނީ 16 ޖޫން 2015ގައެވެ. 33 މިލިޔަން ރުފިޔާއަށް މި މަސައްކަތް ހަވާލުކޮށްފައިވަނީ މަސައްކަތްފަށާތާ އެއްއަހަރު ދުވަހުގެ ތެރޭގައި ނިންމާގޮތަށެވެ.
މިމަޝްރޫއުގެ ދަށުން އޭދަފުށީގެ މަގުތަކުގައި ތާރުއަޅާނީ ޖުމްލަ 3.36 ކިލޯމީޓަރުގައެވެ
