ލޯކަލް ކައުންސިލް ތަކުގެ ބެލުުމުގެ ދަށުގައިވާ ބިންތަކާއި ވަސީލަތްތައް ސިޔާސީ ޕާޓީތަކުގެ ހަރަކާތްތައް ހިންގުމަށް ދޫނުކުރުމަށް ލޯކަލް ގަވަރންމަންޓް އޮތޯރިޓީ( އެލްޖީއޭ) އިން ކައުންސިލްތަކަށް އަންގައިފި އެވެ.
އެލްޖީއޭ އިން އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާއި އުސޫލު ތަކަށް ހަވާލާދީ ބުނެފައިވަނީ ކައުންސިލްތަކުގެ އިހުތިސާސްގައިވާ ބިންތަކާއި އިމާރާތްތަކަކީ އާއްމު ރައްޔިތުންނަށް ޚިދުމަތް ދިނުމަށާއި އިޖްތިމާއީ މަންފާއަށް ޚާއްސަ ކުރެވިފައިވާ ތަންތަން ކަމުގައެވެ. އެހެންކަމުން ވަކި ސިޔާސީ ފިކުރަކަށް ނުވަތަ ޕާޓީއަކަށް ނަފާވާ ގޮތަށް ނުވަތަ ސިޔާސީ އެއްވުންތަކާއި ހަރަކާތްތައް ބޭއްވުމަށް އެފަދަ ތަންތަން ދޫކުރުމަކީ ގާނޫނީ ގޮތުން ކައުންސިލްތަކަށް ލިބިފައިވާ ބާރެއް ނޫން ކަމަށް އެއޮތޯރިޓީން ފާހަގަކޮށްފައިވެ އެވެ.
”އަދި ކައުންސިލު އިދާރާއަކީ ރައްޔިތުން ޚިދުމަތް ހޯދުމަށް އަންނަ މުހިއްމު އިދާރާއެއްކަމުން އެފަދަ ތަންތަނުގައި ސިޔާސީ ހަރަކާތްތައް ހިންގުމަކީ ރައްޔިތުންގެ ހިތުގައި ނުތަނަވަސްކަން އުފެދިގެންދާނެ ކަމެއް ކަމުގައި ވެސް ދެކެމެވެ.“އެލްޖީއޭގެ ސިޓީގައި ލިޔުއްވައިފައިވެއެވެ.
މީގެ އިތުރުން އެކި މީޑިއާތަކުންނާއި ޚަބަރު ފަތުރާ ވަސީލަތްތަކުން ރިޕޯޓު ކޮށްފައިވާ ގޮތުގައި ބައެއް ރަށްރަށުގެ ކައުންސިލްތަކުން ސިޔާސީ ޕާޓީތަކުގެ ޖަލްސާތަކަށާއި ކެމްޕޭން ހަރަކާތްތަކަށް ކައުންސިލު ތަކުގެ ބިންތަކާއި މައިޒާންތައް ދޫކުރާ ކަމުގެ ޝަކުވާ އެލްޖީއޭ އަށް ލިބެމުން ދާކަމަށާއި އެއޮތޯރިޓީގެ މައިގަނޑު މަގުސަދަކީ ކައުންސިލްތަކުން އަމަލު ކުރަނީ އާއްމު މަސްލަހަތު އިސްކޮށް ވަަކިފަރާތަކަށް ޖެހުމެއް ނެތި ހަމަހަމަކަމާއެކު ޚިދުމަތް ފޯރުކޮށްދިނުންކަން ކަށަވަރު ކުރުން ކަން ސިޓީގައި ބުނެފައިވެ އެވެ.
އެހެންކަމުން ކައުންސިލުތަކުގެ މުދާތަކާއި ވަސީލަތްތައް ސިޔާސީ ޕާޓީއެއް ޕްރޮމޯޓުކުރުމަށް ނުވަތަ ވަކި ބަޔަކަށް މަންފާވާ ގޮތަށް ބޭނުން ނުކުރުމަށާއި ކައުންސިލުތަކުގެ ބިންތަކުގައި ސިޔާސީ ހަރަކާތްތައް ނުހިންގުމަށް ކައުންސިލުތަކަށް އެލްޖީއޭ އިން ކައުންސިލްތަކަށް ފޮނުވި ސިޓީގައި އަންގަވާފައި ވެއެވެ.
