ސަރުކާރުން ކުރާ ހަރަދުތައް ހަމަޖެއްސުމުގެ ގޮތުން، ކުރު މުއްދަތުގައި ދައްކަން ޖެހޭ 1.5 ބިލިއަން ރުފިޔާގެ ޓީބިލް ގަންނާނެ ފަރާތެއް ހޯދަން ފިނޭންސް މިނިސްޓްރީން އިއުލާނު ކޮށްފިއެވެ.
ފިނޭންސް މިނިސްޓްރީން އިއްޔެ ކުރި އިއުލާނެއްގައި ބުނީ، އަންނަ ހޮނިހިރު ދުވަހު ހަތަރު ޓީބިލެއް ވިއްކާލަން ހަމަޖެހިފައިވާ ކަމަށެވެ. އެ ޓީބިލްތަކަކީ:
- 674 މިލިއަން ރުފިޔާގެ ޓީބިލް (3.5 ޕަސެންޓު އިންޓްރެސްޓުގައި) – 28 ދުވަހުން (އަންނަ މަހުގެ 14 ގައި)
- 188 މިލިއަން ރުފިޔާގެ ޓީބިލް (3.87 ޕަސެންޓު އިންޓްރެސްޓުގައި) – 98 ދުވަހުން (އަންނަ މޭ 23 ގައި)
- 205 މިލިއަން ރުފިޔާގެ ޓީބިލް (4.23 ޕަސެންޓު އިންޓްރެސްޓުގައި) – 182 ދުވަހުން (އަންނަ އޮގަސްޓު 15 ގައި)
- 466.3 މިލިއަން ރުފިޔާގެ ޓީބިލް (4.6 ޕަސެންޓު އިންޓްރެސްޓުގައި) – އެއް އަހަރުން (އަންނަ ފެބްރުއަރީ 13 ގައި)
ފިނޭންސް މިނިސްޓްރީގެ ތަފާސްހިސާބުތަކުން ދައްކާ ގޮތުގައި މިހާތަނަށް ސަރުކާރުން 58.7 ބިލިއަން ރުފިޔާގެ ޓީބިލް ވިއްކާފައިވާއިރު، އޭގެން އެއްވެސް ޓީބަލަކަށް އަދި ފައިސާއެއް ނުދައްކައެވެ. އޭގެ ތެރޭގައި ހިމެނެނީ:
- އެއް މަހުން ދައްކަން ޖެހޭ 3.3 ބިލިއަން ރުފިޔާ
- ތިން މަހުން ދައްކަން ޖެހޭ 2.5 ބިލިއަން ރުފިޔާ
- ހަ މަސް ދުވަހުން ދައްކަން ޖެހޭ 2.4 ބިލިއަން ރުފިޔާ
- އެއް އަހަރުން ދައްކަން ޖެހޭ 23 ބިލިއަން ރުފިޔާ
އެ އިއުލާނުގައިވާ ގޮތުން ޓީބިލްތައް ގަންނަ ފަރާތްތަކުން އަންނަ ހޯމަ ދުވަހު ސަރުކާރަށް ފައިސާ ދައްކަން ޖެހޭނެއެވެ.
ސަރުކާރުން ވިއްކާ ޓީ-ބިލްތައް އާންމުކޮށް ގަންނަނީ ޕެންޝަން ފަންޑާއި ބޭންކުތަކާއި ސަރުކާރު ހިއްސާވާ ބައެއް ކުންފުނިތަކުންނެވެ.
ރައްޔިތުންގެ މަޖިލީހުން މި އަހަރަށް ފާސް ކޮށްފައިވަނީ 9.7 ބިލިއަން ރުފިޔާގެ ޑެފިސިޓް ބަޖެޓަކަށް ވެފައި ލޯނު އަނބުރާ ދެއްކުމަށް 2.9 ބިލިއަން ރުފިޔާގެ އިތުރުން އެހެނިހެން ކަންކަމަށް ބޭނުންވާ އިތުރު 805 މިލިއަން ރުފިޔާ އާ އެކު، ޖުމްލަ 13.4 ބިލިއަން ރުފިޔާގެ އާމްދަނީ އިތުރަށް ބޭނުންވާނެ އެވެ.
އެ ފައިސާގެ ތެރެއިން ބައެއް ހަމަޖެއްސުމަށް ނިންމާފައިވަނީ ޓީބިލް ވިއްކައިގެންނެވެ.
