ސަރުކާރާއި އާއްމުން ހިއްސާވާ ކުންފުނި ، އެސްޓީއޯއިން އޭދަފުށީ ގައި ހިންގާ ފިހާރައިން ކައްކާ ގޭސް ވިއްކުން ހުއްޓާލައިފިއެވެ.
މިކަމާ ގުޅިގެން އެފިހާރައަން ވަންނަ ދޮރުގައި ހަރުކޮށްފައިވާ ނޯޓެއްގައި ބުނެފައިވަނީ 1 މޭ 2017 ވަނަ ދުވަހުން ފެށިގެން މި ފިހާރައިން ވިއްކަމުންގެންދިޔަ މޯލްޑިވްގޭސް ވިއްކުން ހުއްޓާލަން ނިންމައިފިކަމަށާ މިކަމަށް ޓަކާ ކަސްޓަމަރުންނަށް ދިމާވެދާނެ އުނދަގުލަކަށް މައާފް އެދޭ ކަމަށެވެ. ގޭސް ވިއްކުން ހުއްޓާލަން ޖެހުނު ސަބަބެއް އެނޯޓުގައި ހާމަ ކޮށްފައެއް ނުވެއެވެ.
އެސްޓީއޯއިން އަތޮޅު ތެރޭގައި ގޭސް ވިއްކަން ފަށާފައިވަނީ ކައްކާ ގޭހަކީ ދިރިއުޅުމުގެ އަސާސީ ބޭނުމެއްކަމަށް ވެފައި ގޭސް ހޯދަން ރައްޔިތުން އުފުލަމުން އައި ބުރަ ތަކަށް ލުޔެއް ހޯދައިދިނުމަށް ކަމަށް އޭރު އެސްޓީއޯ އިން ބުނަމުން ގެންދިޔައެވެ. އެހެންނަމަވެސް ކުރިން އެެންގުމަކާ ނުލައި މިގޮތަށް ކުއްލިއަކަށް ގޭހުގެ ޚިދުމަތް ދިނުން ހުއްޓާލުމަކީ އެސްޓީއޯއާމެދު ރައްޔިތުން ދެކެމުން އައިގޮތާ ކުރަމުން އައި އިތުބާރާ ޔަގީން ކަމާމެދު ރައްޔިތުން ސުވަާލު އުފައްދާ ކަމެކެވެ.
އެސްޓީއޯ ފިހާރައިގެ ނޯޓުގައި އިތުރަށް ބުނެފައިވަނީ “ނަމަވެސް މޯލްޑިވް ގޭސް އިން އޭޖެންޓެއް (ކިރިލި ފިހާރަ ) މެދުވެރިކޮށް މި ރަށުގައި ގޭސް ވިއްކުމުގެ އިންތިޒާމް ހަމަޖައްސާފައިވާ ” ކަމުގައެވެ.
ކިރިލި ފިހާރައަކީ މިހާރު ވިޔަފާރި ކުރުން ހުއްޓާލާފައިވާ އެމްޑީޕީގެ އެކްޓިވިސްޓް މުހައްމަދު ޝާކިރުގެ ފިހާރައެކެވެ.
މޯލްޑިވް ގޭހުގެ އޭދަފުށީގެ އެޖެންޓް މުހައްމަދު ޝާކިރު ވިދާލުވީ އެސްޓީއޯއިން ވިއްކި އަގަށް ގޭސް ލިބެން ހުންނާނެކަމަށާއި ދިހަ ކިލޯގެ ފުޅިއެއްގެ އަގަކީ 255ރުފިޔާ ކަމުގައެވެ.
މާލޭ ސަރަހައްދުގައި މޯލްޑިވް ގޭހުގެ 10 ކިލޯގެ ފުޅިއެއް ވިއްކަނީ 200 ރުފިޔާއަށެވެ.
