ކުޅުނު އެއްވެސް މެޗަކުން ބަލިނުވެ މިނިވަން ޗެންޕިއަންޝިޕް ޒޯން 3 މިއަހަރުގެ މުބާރާތުގެ ފައިނަލްގެ ފަހުޖާގަ އޭދަފުށި ފުޓްބޯޅަ ޓީމް ހޯދައިފިއެވެ
އޭދަފުށި ފައިނަލުން ޖާގަހޯދީ އިއްޔެ ޅ. އޮޅުވެލިފުށީގައި އެރަށު ޓީމާ ދެކޮޅަށް ކުޅުނު މެޗް 1-0 ގެ ނަތީޖާއަކުން ކަމިޔާބުކޮށް ޕޮއިންޓް ޓޭބަލްގެ 1 ވަނަ ހޯދައިގެންނެވެ. 3 ޓީމް ވާދަކުރާ މިމުބާރާތުގެ ފައިނަލަށް ދެން ދަތުރުކުރީ އޮޅުވެލިފުށި ޓީމެވެ. އެރަށުޓީމުން ވަނީ ހޮނިހިރުދުވަހު އުނގޫފާރު ފުޓްބޯޅަޓިމް 2-0ން ބަލިކޮށްފައެވެ.
އިއްޔެ އޮޅުވެލިފުށިގައި ކުޅުނު މެޗް އޭދަފުށި ކާމިޔާބުކުރީ މެޗްގެ ފުރަތަމަ ހާފުގައި ފޯވާޑް އަބްދުލް ސަލާމު އަހުމަދު ކާމިޔާބުކޮށްދިން ލަނޑުންނެވެ. ފޯރިގަދަ ކުޅުމެއް ފެނިގެން ދިޔަ މި މެޗްގައި އޭދަފުށީގެ 5 ކުޅުންތެރިޔަކަށް ވަނީ ރީނދޫ ކާޑް ދައްކާފައެވެ.
އޭދަފުއްޓާއި އޮޅުވެލިފުށި ބައްދަލުކުރާ ފައިނަލަށް މެޗް އޮންނާނީ މިމަހު 27 ވާ ބުރާސްފަތި ދުވަހު ހަވީރު އޮޅުވެލިފުށި ފުޓްބޯޅަ ދަނޑުގައެވެ.
