ބ. އަތޮޅުގެ ރަށްރަށުގައި އަނބު ތިޔާގިވެ، އަނބުގެ އަގުތަށް ވަރަށް ބޮޑަށް ވެއްޓިއްޖެއެވެ.
ބ. އަތޮޅުގައި އަނބު ހައްދައި އޭގެ ވިޔަފާރި ފުޅާ ދާއިރާއެއްގައި ކުރަމުންދާ މާޅޮސް، ހިތާދޫ އަދި ގޮއިދޫގެ ގަސްތަކުގައި މިހާރުވަނީ ގިނަ އަދަދަކަށް އަނބުއަޅައި، ހަރުވެފައެވެ. އެރަށްރަށުން ވާހަކަ ދެއްވި އަނބުގެ ވިޔަފާރިކުރާ ފަރާތްތަކުން ބުނަނީ އަނބުގެ އަގު މީގެކުރިން ހުރީ ކިލޯއެއް 60-70 ރުފިޔާގެ އަގުތަކަށް ކަމަށާ، ނަމަވެސް މާކެޓަށް ނުކުންނަމުންދާ އަނބުގެ އަދަދު ވަރަށްބޮޑަށް އިތުރުވެފައިވާތީ، އަނބުގެ އަގު ކިލޯއެއް މިހާރު 50 ރ އަށް ވެއްޓިފައިވާކަމަށެވެ.
އަނބުގެ ވިޔަފާރީގައި އަތޮޅުގައި ލީޑްކުރާ ހިތާދޫ އަނބުގެ ވިޔަފާރިކުރާ ފަރާތްތަކުން ބުނަނީ އެރަށުގައި އަނބު އެޅިއަދަދު މިދިޔަ އަހަރަށްވުރެ ގިނަނޫންނަމަވެސް އަތޮޅުގެ ރަށްރަށުން މާކެޓަށް ނެރޭ އަނބު އިތުރުވަމުންދާތީ އަގު ނުހިފެހެއްޓޭކަމަށެވެ. ގޮއިދޫން އީވީއާ ވާހަކަ ދެއްކި މީހަކު އިއްޔެ ބުނީ އެރަށުގައި 7 ރ އަނބެއް ލިބެން އެބަހުރިކަމަށާ، އަނބު ކިލޯއެއް މިވަގުތު ހުރީ 50 ރ އަށް ކަމަށެވެ. އަދި އަނބު ގިނައަދަދަކަށް ހައްދަމުންގެންދާ މާޅޮހުގެ އަގުތައްވެސް ހިތާދުއާ، ގޮއިދޫއާ އެއްގޮތަށް ދަށަށް ޖެހިލާފައިވާކަމަށް އެރަށުންވެސް ބުނެއެވެ.
ބ. އަތޮޅުގެ އަނބުގެ ވިޔަފާރީގައި އުޅޭ ފަރާތްތަކުން ބުނަނީ މިދުވަސްކޮޅު ރާއްޖޭގެ ގިނަ ސަރަހައްދުތަކެއްގައި އަނބު މޫސުން ފެށިފައިވާތީ، މާލޭގެ މާރުކޭޓްގައިވެސް އަނބުގެ އަގު ވެއްޓިފައިވާކަމަށާ، އަނބުގެ އަގު މައްޗަށް އަރާނީ މިމަހު ފަހުކޮޅު ކަމަށް ބެލެވޭ ކަމަށެވެ.
ބ. އަތޮޅުގެ ރަށްރަށުގައި އަނބު ގަހަކީ ކުރިން ވަރަށް ތަދު އަދި ހައްދަން އުނދަގޫ އެއްޗެއް ނަމަވެސް ފަހަކަށް އައިސް އަތޮޅުގެ ހުރިހާ ރަށެއްގައިވެސް އަނބު ގަސްތައް ދަނީ ހެދި ފޯދެމުންނެވެ. އެގޮތުން ގޮއިދޫއާ، މާޅޮހުގައި މިފަހުން ވަނީ ގިނަ އަދަދެއްގެ އަނބުގަސްތަކެއް ފޯދި އޭގެ މަންފާ ކުރަން ފަށާފައެވެ. އަތޮޅުގެ ވިޔަފާރިވެރިން ބުނަމުންދަނީ އަނބުގެ ވިޔަފާރީގައި ޒަމާނުއްސުރެ ހިތާދޫ ހިފަހައްޓަމުން އައި ރެކޯޑް ވަރަށް އަވަހަށް އެހެންރަށަކުން އަތުލާނެކަމަށެވެ.
