އޭދަފުށީ ފުޓްބޯޅަ ޓީމަށް އޭދަފުށީ ރައްޔިތުން ރަތް ދޫލައިގެ މަރްހަބާއެއް ކިޔައިފިއެވެ.
މިނިވަން ފުޓްބޯޅަ މުބާރާތުގެ ޗެމްޕިއަންގެ ފަޚްރުވެރި މަގާމާއެކު ތަށި ހިފައިގެން ޓީމް މިއަދު ހަވީރު އޭދަފުށްޓަށް އައުމުން މަރުހަބާ ކިއުމަށް ގިނަ އަދަދެއްގެ ރައްޔިތުންވަނީ ރަތްކުލައިގެ ހެދުމުގައި ބަނދަރުމައްޗަށް ޖަމާ ވެފައެވެ. ޓީމް ރަށަށް ފޭބުމާއެކު ކޮންމެ ކުޅުންތެރިއަކަށް މަލުގެ ގުލްދަސްތާއެއް ވެދުން ކުރަމުން ދިޔައިރު މަރްހަބާގެ އަޑުން މުޅި ޖައްވު އޮތީ ގުގުމާލާފައެވެ.
ހަވީރުގެ ހިތްގައިމު ވަގުތު ކުޅުންތެރިންގެ މޫނުމަތިން ފެންނަމުން ދިޔަ އުއްމީދީ އުފާވެރި ހިނިތުންވުމާ އެކު އަޑުގަދަކުރާއިން އިއްވަމުން ގެންދިޔަ މުނާސަބަތަށް ޚާއްސަކޮށް ހުރިހާކުޅުންތެރިންގެ ނަންތައް ވަކި ވަކިން ފާހަގަކޮށް ހަދާފައިވާ ރީތި ލަވައިގެ އަޑުން މާހައުލަށް އޮތީ އިތުރު އުފާވެރިކަމެއް ވެރިވެފައެވެ..
މި މުބާރާތުގެ ޗެމްޕިއަންކަން އޭދަފުށީ ފުޓްބޯޅަ ޓީމް ހޯދާފައިވަނީ ފައިނަލުގައި ތިމަރަފުށްޓާ ބައްދަލުކޮށް ރޭ ކުޅެވުނު ފައިނަލް މެޗުން 1- 0 އިން މޮޅުވެގެންނެވެ.
