ބ އާއި ޅ. އަތޮޅުގެ ސްކޫލުތަކުގެ އިސްވެރީންނަށް ލީޑަޝިޕް އެންހޭންސްމެންޓް ވޯކްޝޮޕެއް ބާއްވައި ފިއެވެ.
އިއްޔެއިން ފެށިޒގެން މިއަދުގެ ނިޔަލަށް އޭދަފުށީ މަލްޓިޕާޕަސް ހޯލުގައި ބޭއްވި މި ވޯކްޝޮޕްގައި މި ދެ އަތޮޅުގެ 16 ސްކޫލަކުން ޕްރިންސިޕަލުންނާއި ލީޑިން ޓިޗަރުން ހިމެނޭހެން ޖުމްލަ 49 ބޭފުޅުން ބައިވެރިވެވަޑައިގަތެވެ.
މި ވޯކްޝޮޕްގެ ސެޝަންތައް ނަންގަވައި ދެއްވީ ސްރީލަންކާގެ ނެޝަނަލް އިންސްޓިޓިއުޓް އޮފް އެޑިޔުކޭޝަންގެ ޑިރެކްޓަރު ޖެނެރަލް ޕްރޮފެސަރު ޕްރަސާދު ސެތުންގާ އެވެ.
ވޯކްޝޮޕްގެ މަގުސަދަކީ ސްކޫލްތައް ހިންގުމުގައި ބޭނުންކުރާ ޒަމާނީ އާ ގޮތްތަކާއި، އާ އީޖާދުތަކާ ގުޅޭ މަޢުލޫމާތު ޕްރިންސިޕަލުންނާ ހިއްސާކޮށް، އެކަމަށް އަހުލުވެރި ކުރުވުން ކަމަށް އެޑިއުކޭޝަން މިނިސްޓްރީން ބުންޏެވެ. އެގޮތުން މީގެ ތެރެއިން ބައިވެރިންގެ މެދުގައި ރަނގަޅު ނެޓްވޯކެއް އުފެދި، ކުރިމަގުގައި އެއް ބަޔަކު އަނެއް ބަޔަކަށް އެހީތެރިވެ، މައުލޫމާތު ހިއްސާ ކުރުމަށް މަގުފަހިވެގެން ދާނެ ކަމަށް މިނިސްޓްރީން ބުންޏެވެ.
ސިލްސިލާކޮށް ބާއްވަމުން އަންނަ މި ވޯކްޝޮޕް މިހާތަނަށް ގދ، ގއ، ކ، މާލެ، އައްޑޫ، ފުވައްމުލައް، އއ، ވ، މ، ފ، ދ އަދި ރ. އަތޮޅުގައި ވެސް ހިންގާފައިވެ އެވެ.
