ސަތޭކައަށްވުރެ ގިނަ ދަރިވަރުންނާއެކު ރާއްޖޭގެ އެކި ކަންކޮޅުތަކުގައި ދިވެހި ބަހުގެ އެކެޑަމީން އަދަބީ ތިން މުބާރާތެއް މިއަދު ފަށައިފިއެވެ.
މިއީ ދިވެހި ބަހުގެ އެކެޑަމީން މިއަހަރު ބާއްވާ ގައުމީ ތިން މުބާރާތެކެވެ.
މި މުބާރާތްތަކުގެ ތެރޭގައި ހިމެނެނީ، އަލްއުސްތާޒު މުހައްމަދު ޖަމީލު ދީދީގެ ހަނދާނީ ވާދައިގެ ތައްޓަށް ބާއްވާ މަޒުމޫނު ލިޔުމުގެ 39ވަނަ ގައުމީ މުބާރާތާއި އައްޝައިޚް މަލިމް މޫސާ މާފަތްކަލޭފާނުގެ ހަނދާނީ ވާދައިގެ ތައްޓަށް ބާއްވާ ކުރުވާހަކަ ލިޔުމުގެ 36ވަނަ ގައުމީ މުބާރާތާއި ހުތްއަލިދީދީގެ ވާދައިގެ ތައްޓަށް ބާއްވާ ޅެންހެދުމުގެ 27ވަނަ ގައުމީ މުބާރާތެވެ.
މަޒުމޫނު ލިޔުމުގެ މުބާރާތް ހެނދުނު 8:00 އިން 11:00ގެ ނިޔަލަށް ކުރިއަށް ގެންގޮސްފައި ވާއިރު، 13:00އިން 16:00ގެ ނިޔަލަށް ކުރު ވާހަކަ ލިޔުމުގެ މުބާރާތް ކުރިއަށް ދާނެއެވެ. އަދި، ޅެން ހެދުމުގެ މުބާރާތް ކުރިއަށް ގެންދިޔުމަށް ނިންމާފައި ވަނީ އިރުއޮއްސި 18:00 އިން 21:00ގެ ނިޔަލަށެވެ.
ދިވެހި ބަހުގެ އެކެޑަމީން މައުލޫމާތު ދެއްވި ގޮތުގައި، މަޒުމޫނާއި ކުރުވާހަކަ ލިޔުމުގެ މުބާރާތުގައި 800އަށް ވުރެ ގިނަ ދަރިވަރުން ބައިވެރި ވެއެވެ.
މީގެ އިތުރުން، އެކި ސްކޫލުތަކުން ޅެން ހެދުމުގެ މުބާރާތުގައި 400 ދަރިވަރުން ވަނީ ބައިވެރިވެފައެވެ.
މިމުބާރާތް ތަކުގައި ބ.އަތޮޅު ތައުލީމީ މަރުކަޒުން ބައިވެރިވެފައި ވާއިރު އެންމެ އަތޮޅަކުން ފިޔަވައި ހުރިހާ އަތޮޅަކުން ބައިވެރިވެއެވެ. އެގޮތުން އަތޮޅުތަކުގެ 82 ސްކޫލަކުން މި މުބާރާތްތަކުގައި ވާދަކުރެއެވެ. އަދި މާލޭ ސަރަހައްދުން 22 ސްކޫލަކުން ބައިވެރިވެފައިވެއެވެ.
މި މުބާރާތްތައް މުޅި ރާއްޖޭގައި ކުރިއަށްގެންދަނީ ލޯކަލް ގަވަމެންޓު އޮތޯރިޓީއާއި ސިޓީ ކައުންސިލްތަކާއި އަތޮޅު ކައުންސިލްތަކާއި ރަށު ކައުންސިލްތަކުގެ އެހީތެރިކަމާއެކުގައެވެ.
