މިދިޔަ އަހަރުގެ މާޗް މަހު އައްޑުއަށް ގެންދިޔަ އަސްތައް މިހާރު ކިހާމޯލްޑިވްސް އަށް ގެނެސްފައިވާ ކަމަށް އައްޑޫގެ ސަދަން ސްޓޭލިއަންސް އިން ބުނެފިއެވެ.
ކިހާ މޯލްޑިވްސް ރިސޯޓަށް ގެނެސްފައިވަނީ ތިން އަހެވެ. މިއަސްތައް އެރިސޯޓަށް ގެންދިޔައީ އެތަނުން ލިބުނު ހުށަހެޅުމަކާ ގުޅިގެން ދެ ފަރާތުގެ މެދުގައި ހެދި އެއްބަސްވުމެއްގެ ދަށުން ކަމަށް ސަދަން ސްޓޭލިއަންސް އިންބުނެއެވެ.
އެހެން ނަމަވެސް މި އަހަރުގެ އޮގަސްޓް ހިސާބުގައި އަނެއްކާ ވެސް އަސްތައް އައްޑު ގެންނަން ނިންމާފައިވާކަމަށް ސަދަން ސްޓޭލިއަންގެ މެނޭޖިން ޑިރެކްޓަރު މުހައްމަދު އަދުލީލު ”މިހާރު “ނޫހަށް މައުލޫމާތު ދެއްވަމުން ވިދާޅުވި އެވެ.
”އަހަރެމެންނަށް އަސް ގެނެވުނު ދަނޑިވަޅަކީ ކޮވިޑްގެ ސަބަބުން އައްޑޫގެ ޓޫރިޒަމް ވެސް ވަރަށް ބޮޑަށް ހުއްޓިފައި އޮތް ވަގުތަކަށްވުމާ އެކީ އެކަމުން ނެރެން އުޅުނު ނަތީޖާ އެހާ ރަނގަޅެއް ނޫން.” އޭނާ ވިދާޅުވި އެވެ.