އޭދަފުށިން މަރުވި އުމުރުން ދުވަސްވީ ފިރިހެނަކު ކޮވިޑަށް ފައްސިވެއްޖެ އެވެ
އޭނާ ކުއްލި ގޮތަކަށް ނިޔާވި ނަމަވެސް ރޭ ވެސް އޭނާގެ ހާލު ރަނގަޅު ކަމަށާ 85 އަހަރުގެ އެމީހާ ކޮވިޑަށް ފައްސިވެފައިވާ ކަން އެނގުނީ މަރުވުމަށް ފަހު ހެދި ކޮވިޑް ޓެސްޓުންކަމަށް މައުލޫމާތު ލިބެއެވެ.
އެމީހާގެ ހާލު ރެއާހަމައަށް ރަނގަޅުކަމަށާ މިއަދު ހެނދުނު ހޮސްޕިޓަލަށް ގެންދިޔައިރު ވަނީ މަރުވެފައި ކަމަށް މައުލޫމާތު ލިބެއެވެ.
އެމީހާގެ ކަށުކަމާކެމީގެ ކަންތައް ކުރިއަށް ގެންދިއުމަށް ނިންމާފައިވަނީ ކޮވިޑްބަލީގައި މަރުވާ މީހުންނާ މެދު އަމަލުކުރަން އޮންނަ އުސޫލުގެ މަތިން ކަމަށް އޭދަފުށީ ކައުންސިލުން މައުލޫމާތު ދެއްވަ އެވެ.
ކޮވިޑު ޖެހިފައިވާ މީހަކު މަރުވެއްޖެނަމަ ވީ އެންމެ އަވަހަކަށް ވަޅުލުމަށް އެޗްޕީއޭއިން ވަނީ އަންގާފަ އެވެ. އަދި ބަލި ފެތުރުން ކޮންޓްރޯލް ކުރުމަށް ވީހާވެސް މަދު ބަޔަކަށް މޫނު ދެއްކުމަށްވެސް ވަނީ އަންގާފަ އެވެ.
އޭދަފުށީގައި ކޮވިޑްގެ ނުރައްކާ ބޮޑުވެ މިހާރު ވަނީ ޚާއްސަ ހާލަތްތަކުގައި ނޫނީ ގެއިން ބޭރަށް ނުކުތުން މަނާކޮށް ކާފިއު ހިންގާފައެވެ.
ރޭގެ ނިޔަލަށް އޭދަފުށީގައި ކޮވިޑަށް ފައްސިވެފައިވާ 85 މީހުން ތިބި ނަމަވެސް މިއީ މިބަލީގައި އޭދަފުށިން މަރުވި ފުރަތަމަ މީހާއެވެ.