ރައީސް އިބްރާހިމް މުހައްމަދު ސޯލިހްގެ 100 ވައުދުގެ ތެރޭގައި ހިމެނޭ ސްކޫލްތަކުގެ ކުދިންނަށް ހެނދުނު ހެނދުނުގެ ނާސްތާދިނުމުގެ ޕްރޮގްރާމް ފެށުމުގެ ގޮތުން އަންނަ ދިރާސީ އާ އަހަރާއެކު 25 ސްކޫލެއްގައި މި ޕްރޮގްރާމް ހިންގުމަށް މިނިސްޓްރީއޮފް އެޑިއުކޭޝަނުން ނިންމައި އޭގެ ތެރޭގައި ބ.އަތޮޅު ތައުލީމީ މަރުކަޒު ހިމަނައިފިއެވެ.
މި ޕްރޮގްރާމް ކުރިއަށް ގެންދަން ހަމަޖެހިފައިވާ ގޮތުގެ ބައެއް ތަފްސީލްތައް ދެއްވަމުން މިނިސްޓަރ އައިޝަތު އަލީ ވިދާޅުވީ ދިރާސީ އާ އަހަރާއެކު ފަށަނީ “ހެނދުނު ނާސްތާ” ޕްރޮގްރާމްގެ އެއް އަހަރު ދުވަހުގެ ޓެސްޓު ބުރެެއްގެ ގޮތުގައި ކަމަށެވެ. އެގޮތުން އެއް އަހަރު ދުވަހަށް މި ޕްރޮގްރާމް ހިންގަން މިނިސްޓްރީ އިން ހޮވާފައިވަނީ ވަނީ ރާއްޖޭގެ ކޮންމެ އަތޮޅަކުން އެއް ސްކޫލާއި މާލެއިން ތިން ސްކޫލާއި ވިލިމާލެއިން އަދި ހުޅުމާލެއިން އެއް ސްކޫލެވެ.
ރާއްޖޭގައި މި ޕްރޮގްރާމް ފަށާނީ އެންމެ އަވަސް ވެގެން 2020 ވަނަ އަހަރު ކަމަށް އެކަމަނާ ވިދާޅުވިއެވެ.
މިނިސްޓަރު އައިޝާ ވިދާޅުވީ، ނާސްތާ ޕްރޮގްރާމަށް މިހާރު ހޮވާފައިވާ ސްކޫލްތަކަކީ ތަފާތު ފަސް ގިންތިއެއްގައި ހިމެނޭ ސްކޫލްތަކެއް ކަމަށާ އެންމެ ދަރިވަރުންގެ އާބާދީ މަދު ސްކޫލްތަކާއި އެންމެ އާބާދީ ގިނަ ސްކޫލްތައް ފުރަތަމަ 25 ސްކޫލް ލިސްޓުގައި ހިމެނޭނެ ކަމުގައެވެ.
މިނިސްޓަރު ވިދާޅުވީ، މިނިސްޓްރީން ބަލަނީ ދުޅަހެޔޮ ސިއްހަތެއްގައި ކުދިން ބޭތިއްބުމަށާއި، ކިޔެވުމަށް ބޭނުންވާ ހަކަތަ ލިބޭކަހަލަ އެއްޗެހި ނާސްތާގެ ގޮތުގައި ދަރިވަރުންނަށް ދިނުމަށް ކަމަށެވެ. އަދި ބެލެނިވެރިއަކު ބޭނުން ނުވާ ނަމަ އެ ދަރިވަރަކު ނާސްތާގައި ބައިވެރި ނުކުރާނެ ކަމުގައެވެ.
ނާސްތާ ޕްރޮގްރާމްގެ ހިޔާލާ ގުޅިގެން އަރާފައި އޮތް އޮޅުމެއް ރަނގަޅުކޮށްދެއްވަމުން މިނިސްޓާ އާއިޝަތު ވިދާޅުވީ، ސްކޫލްތަކުން އަބަދު ދޭނީ އެކައްޗެއް ނޫން ކަމަށެވެ. ކޮންމެ ސްކޫލެއްގައި ވެސް ކޮންމެ ދުވަހަކުވެސް ނާސްތާގެ ތިން މެނޫ އޮންނާނެ ކަމަށް ވިދާޅުވި އެވެ. އަދި އެ މެނޫގެ ތެރެއިން ކުދިންނަށް އެކުދިން ބޭނުންވާ ކޮންމެވެސް ތިން އެއްޗެއް ނެގުމުގެ އިހްތިޔާރު އޮންނާނެ ކަމަށް ވެސް ވިދާޅުވި އެވެ.
ނާސްތާ މެނޫގައި ހިމެނޭ ބައެއް ބާވަތްތައް
ރޮށި
ޕާން
ބިސްގަނޑު
ކިރު
ފަތު މަސްހުނި
ބޭކަޑްބީންސް
ސޭންޑްވިޗް
ބަރަބޯ މަސްހުނި
ޗީޒް ސޭންޑްވިޗް
ބަށި މަސްހުނި
ޕީނަޓް ބަޓާ
ތަރުކާރީ މަސްހުނި
ނާސްތާގެ ކާތަކެތި ކުދިންނަށް ދޭއިރު ސާފު ތާހިރުކަމާއި އެތަކެތީގެ ތާޒާކަން ވަރަށް ރަނގަޅަށް ކަށަވަރުކުރާނެ ކަމަށާ އެކަމަށްޓަކައި ސްކޫލްތަކުގައި ވިލަރެސް ކޮމިޓީ އުފައްދާނެ ކަމަށް ވެސް ވިދާޅުވި އެވެ.
އަންނަ އަހަރު ނާސްތާ ފޯރުކޮށްދިނުމަށްޓަކައި، މިހާރު ހުރި ހާލަތުން ފެށުމަށްޓަކައި ރަށްރަށުގައި ކޭޓަރިންގ ދެއްވާ ފަރާތްތަކާ ބީލަމުގެ އުސޫލުން ހަވާލުކުރިނަމަވެސް ކުރިމަގުގައި ސްކޫލްތަކުގައި ކުދިންނަށް ބޭނުންވާ ޑައިނިންގ ރޫމާއި، ބަދިގެތައް ތަރައްޤީ ކުރުމަށް ވިސްނާކަމަށް މިނިސްޓަރު ވިދާޅުވިއެވެ.
ކިޔުންތެރިންގެ ޚިޔާލު