2004ވަނަ އަހަރު ޑިސެމްބަރ 26 ވަނަ ދުވަސް ތާރީޚްގައި ލިޔެވިގެންދާނީ ރާއްޖެއަށް ދިމާވެފައިނުވާ ބިރުވެރި ކާރިސާއެއް ފުރަތަމަފަހަރު ތަޖްރިބާ ކުރަން ޖެހުނު ހިތާމަވެރި ދުވަހުގެ ގޮތުގައެވެ. އޭގެފަހުން މިހާރު 13އަހަރުވެގެން ދިޔައިރު އަދިވެސް ކާރިސާގެ ބިރުވެރިކަން އިއްޔެވީ ކަމެއްހެން ހަނދާނުގައިހުރި އެތައް ބަޔަކު އެބަ އުޅެއެވެ.
ބ. ކިހާދޫ ކައުންސިލްގެ ޒިންމާދާރުވެރިޔާ އަބްދުﷲނަސީމުއަކީ އެކާރިސާ ލޮލުން ދެކެ އަތުން ހިފާފައިވާ އެކެކެވެ.
ކިހާދޫއަކި ސުނާމީ ކާރިސާގައި އެންމެ ބޮޑަށް ގެއްލުން ލިބުނު އެއް ރަށެވެ. އާބާދީގައި 500 އެއްހާ މީހުން ދިރިއުޅޭ އެރަށް ސުނާމީގައި ދޮވެވިގެން ދިޔައީ އެކަމުން ދިފާއުވާނެ ފުރުސަތެއްވެސް ނުލިބި ހަމަ ކުއްލިއަކަށެވެ. މާތްﷲގެ ކުޅަދުންވަންތަކަމުގެ ދަލީލަކާއެކު ހިތްތަކަށް ބިރުވެރިކަން ވައްދުވައި ދީފައެވެ. އެ މަންޒަރު ދެންމެ ވީކަމެއްހެން ހަނދާނުގައި ތާޒާކޮށް އެބަހުރިކަމަށް ބުނަމުން ކާރިސާ ހިގާ ދިޔަގޮތް ނަސީމް އީވީއާ ހިއްސާ ކުރެއްވިއެވެ.
ކިހާދޫ ކަތީބުގެ މަގާމުގައި ހުންނެވި އަބްދުﷲ ނަސީމް އެދުވަހު ހެނދުނު އޮފީހަށް ދިޔައީ އެހެން ދުވަހެކޭވެސް އެއްފަދައިންނެވެ. މޫސުން އާދައިގެ ގޮތަކަށް ރީތި ދުވަހެކެވެ. އޮފީހަށް ވަދެ ސޮއިކޮށް ހަމަޖެހިލިތަނާ މީހެއްގެ ފަރާތުން އޭނާއަށް ލިބުނީ މާލެއަށް ބިން ހެލުމެއް އައި ޚަބަރެވެ. އެއީ ތެދެއްތޯ ބެލުމުގެ ގޮތުން މާލޭގައި ހުރި ރައްޓެއްސަކަށް ގުޅުމުން ތެދު ޚަބަރެއްކަމާއި އޭނާވެސް އެތަޖްރިބާ ކުރިކަމަށް ބުންޏެވެ. ނިދާފަ އޮއްވާ އެނދުވެސް ގުޑިކަމަށާ އޭރަކު މިއީ ކިހިނެއްވެގެންއުޅޭ ކަމެއްކަން ނޭގުނު ނަމަވެސް އެވާހަކަ އެހެން މީހުންގާތު ބުނުމުން އެމީހުންނަށްވެސް މިފަދަ ކަންތައް ދިމާވެފައިވާތީ ހަގީގަތުގައިވެސް މާލެއަށް ބިން ހެލުމެއް އައިކަން ގަބޫލު ކުރެވިއްޖެކަމަށް ނަސީމް ވިދާޅުވިއެވެ. ކަމުގެ ބިރުވެރިކަން އިހްސާސްކުރެވުނު އަނެއްކަމަކީ ކުއްލިއަކަށް ފޯނުގެ ގުޅުން ކެނޑުމެވެ. އެހެންވީމާ މިއީ އާދައިގެ ކަމަކަށް ނުވާނެކަމަށް ހީކޮށް އަވަހަށް ގެއަށްގޮސް ގޭ ފޯނުން ގުޅަންވެގެން މަސައްކަތް ކުރުމުން ގުޅޭގޮތް ނުވުމުން އެކަން ހުއްޓާލީއެވެ.
އެނބުރި އޮފީހަށް ގޮސް އަނެއްކާވެސް މާލެއަށް ގުޅޭތޯ އަތްގަނޑު ނެގިތަނާ ބިރުވެރި ގޮތަކަށް މީހަކު ވަރަށް ބާރަށް ގޮވާ އަޑުއިވުނީ ބޮޑު ރާޅެއް އެބައާދެއޭ ބުނާ އަޑެވެ.
” އެއަޑު އިވުމުން އޮފީހުން ނުކުމެގެން އަތިރިމައްޗަށް ދިޔައީ. އެވަގުތު ކޮއްކޮ އައިސް އޭނާގެ ދަރިފުޅު ދީފައި މި ދަރި ބަލާށޭ ތިމަން މިދަނީ އަނެއް ދަރި ބަލައޭ ބުނި. އެހެން ބުނި ތަނާ ސުނާމީގެ ބިޔަ ރާޅު ރަށަށް އަރައިފި . ”
ނަސީމް ދުއްވައިގަތީ ގެއާދިމާލަށް އަނބިދަރިންގެ ހާލު ބަލާލާށެވެ. އެހެންނަމަވެސް ގެއަށް ދިޔަ އިރު އަންހެނުންނާ ދަރިން ނެތުމުން ހާސްކަން އިތުރުވެގެން ދިޔައެވެ.. ހަމައެއާއެކު އެވަގުތު ގެއަށް ފެންގަނޑު ވަނުމުން ދެން ހަދަންވީގޮތެއް ނޭގޭ ހިސާބަށް ކަންތައް ދިޔައެވެ.
އޭރުވެސް އަޅުގަނޑުގެ އުރުގައި އެ ކުއްޖާ އޮތް. އަހަންނާ ދެކޮއްކޮ ވެގެން ރަށުގެ ދެކުނު ފަރާތަށް ދާން ވެގެން ، ގެއާ ޖެހިގެން ހުރިމަގަށް ނުކުތްތަނާ މަގުގެ އަނެއްފަރާތު ފާރު ވެއްޓިއްޖެ. ރާޅު އައިސް ފޫޅާ ހަމައަށް އަރައިފި. .އޮފީސް ފެންބޮޑުވެއްޖެ. ރައްޔިތުންނަށް ގޮވާނެ ވަގުތެއް ނުލިބުނު . މުޅިރަށް ފެން ބޮޑުވެއްޖެ.”
ކިހާދުގެ މުޅި އާބާދި އެއްކޮށް ހުރިހާ ގެއަކަށްވެސް ލޮނު ވަދެ ރައްޔިތުން ހަމައެކަނި މަގުމަތިވީއެއް ނޫނެވެ. ގޭގޭގެ ގޮދަޑިތަކާ އަލަމާރިތަކާއި ހިފާގެންގުޅޭ ހުރިހާ ސާމާނެއް ތެމި ފޯވެ ބައެއް ތަކެތި ބޭނުންނުކުރެވޭ ގޮތްވެސް ވީއެވެ. އެހެންވެ ރައްޔިތުން ތިބެން ޖެހުނީ ރަށުގެ ސްކޫލްގައެވެ.
“ރަށުގަ ބޯފެނެއް ނެތް. ރުއްރުކުން ކުރުނބާ އަޅައިގެން ރައްޔިތުންނަށް ބޯފެންދިނީ ވެސް. އެއްވެސް ރަށަކާ ނުގުޅި މުވާސަލާތުވެސް ނުކުރެވޭއިރު ރަށުގައި ކަރަންޓްވެސް ނެތް.” ނަސީމް ވިދާޅުވިއެވެ.
މި ހައްސާސް ދަނޑިވަޅުގައި ރޯޔަލް އައިލެންޑް ރިސޯޓްގެ އެހީތެރިކަން ނަސީމް ފާހަގަ ކުރެއްވިއެވެ. ރައްޔިތުންނަށް ކާބޯތަކެތި ފޯރުކޮށްދިނީ އެރިސޯޓުންނެވެ.
ރައްޔިތުންނަށް އެމީހުންގެ ގެދޮރަށް އަނބުރާ ދެވޭވަރުވީ 3 ދުވަސް ފަހުން ކަމަށް ނަސީމް ވިދާޅުވިއެވެ. އެހާދުވަސްވަންދެން ތިބެން ޖެހުނީ ސްކޫލަގައެވެ.
ސުނާމީ ކާރިސާގައި ކިހާދޫއަށް ލިބުނު ގެއްލުންތަކަށް ބަލާއިރު ފަޅުގައި އަޅާފައި އޮތް އޮޑިދޯނިފަހަރަށްވެސް ބޮޑެތި ގެއްލުންތަކެއް ލިބި އެއް ދޯނި ގެއްލިފައިވެއެވެ. ” ރާޅު ރަށަށް އަރައިގެން ދިޔައިރު އެދޯނި ފަހަރުގެ ވާތައް ކަނޑައިގެން ގޮސް އެއްދޯނި އަނެއް ދޯންޏާއި ޖެހި އެތައް މިތަނަށް ވިއްސި ވިހާލިވެގެން ދިޔައިރު ވަރަށް ބޮޑެތި ގެއްލުން ތަކެއް ލިބުނު.”
ނަސީމް ވިދާޅުވީ ސުނާމީ ކާރިސާއަކި ހިތަށްވެސް ގެންނަން އުނދަގޫ ބިރުވެރި ދުވަހެއްކަމާއި ދެން އެފަދަ ދުވަހެއް ނުދެއްކެވުން އެދި ދުއާ ކުރާ ކަމުގައެވެ..
