ބ. ދަރަވަންދޫ ބަނދަރު ތަރައްގީ ކުރުމުގެ މަސައްކަތް ހަލުވި ކަމާއެކު ކުރިއަށް ދާ ކަމަށާއި މިހާރު ކުރިއަށް ދަނީ ރޮކް ޕްރޮފައިލިންގެ މަސައްކަތް ކަމަށް އެމްޓީސީސީން ބުނެފިއެވެ.
އެ ކުންފުނިން މިކަން ހާމަކުރައްވާ އެކްސްގައި ކުރެއްވި ޕޯސްޓެއްގައި ވިދާޅުވީ، މި މަޝްރޫއުގެ ދަށުން މިހާރު ކުރިއަށްދަނީ ރޮކް ޕްރޮފައިލިންގ މަސައްކަތްތައް ކަމަށެވެ. އަދި މަޝްރޫއަށް ބޭނުންވާ އެއްގަމުތޮށީގެ ބްލޮކްތަކުގެ އެންމެ ފަހު ޝިޕްމަންޓް މިހާރު ވަނީ ދަރަވަންސޫއަށް ގެންގޮސްފައި ކަމަށް ވެސް އެ ކުންފުނިން ވިދާޅުވިއެވެ.
މި މަޝްރޫއުގެ ދަށުން، 30،504 ކިއުބިކް މީޓަރުގެ ސަރަހައްދެއްގެ އާ ހާބަރު ބޭސިން ފުންކުރުމާއި، 1843 ކިއުބިކް މީޓަރުގެ ސަރަހައްދެއްގެ ކުރިން ފުންކޮށްފައިވާ ފަޅު އަލުން ފުންކުރުމުގެ މަސައްކަތް ކުރިއަށްދާނެކަމަށް އެމްޓީސީސީން ބުންޏެވެ. ހަމަ އެހެންމެ، 4126 ކިއުބިކް މީޓަރުގެ ސަރަހައްދެއްގެ ރޭމްޕް އޭރިއާ ފުންކުރުމާއި، 2301 ކިއުބިކް މީޓަރުގެ ސަރަހައްދެއްގެ ނެރު ފުންކުރުމާއި، 352 މީޓަރުގެ ސަރަހައްދެއްގައި ބޭރުތޮށިލުމުގެ މަސައްކަތް ކުރިއަށްދާނެއެވެ.
މި މަޝްރޫއުގެ އަގަކީ 55.48 މިލިއަން ރުފިޔާއެވެ.
