ދިރާސީ އާ އަހަރުގެ ކިޔެވުން އަންނަ އޭޕްރީލް މަހުގެ ހަ ވަނަ ދުވަހު ފަށާ ގޮތަށް ނިންމައިފިއެވެ.
އެޑިއުކޭޝަން މިނިސްޓްރީން އިއްޔެ އާންމުކުރި މި އަހަރުގެ ފައިނަލް އެކަޑެމިކް ކަލަންޑަރުގައިވާ ގޮތުން ފުރަތަމަ ޓާމުގެ ކިޔެވުން ކުރިއަށްދާނީ އެޕްރީލް ހަތްވަނަ ދުވަހުން ޖުލައި 24 ވަނަ ދުވަހުގެ ނިޔަލަށެވެ.
އެ މިނިސްޓްރީން މީގެ ކުރިން އާންމުކުރި ޓެންޓެޓިވް ކަލަންޑަރުގައި ދިރާސީ އާ އަހަރުގެ ކިޔެވުން ފަށަން ކަނޑައެޅީ އެޕްރީލް ހަ ވަނަ ދުވަހެވެ.
ފައިނަލް އެކަޑެމިކް ކަލަންޑަރުގައިވާ ގޮތުން ފުރަތަމަ ޓާމްގެ ކިޔެވުމަށްފަހު ޗުއްޓީ ލިބޭނީ ޖުލައި 28 އިން އޮގަސްޓް ހަތެއްގެ ނިޔަލަށެވެ. އަދި ދެވަނަ ޓާމްގެ ކިޔެވުން ކުރިއަށްދާނީ އޮގަސްޓް 10 ވަނަ ދުވަހުން ޑިސެމްބަރު 25 ވަނަ ދުވަހުގެ ނިޔަލަށެވެ.
އެކަޑެމިކް ކަލަންޑަރުގައިވާ ގޮތުން މި ދިރާސީ އަހަރުގައި ދަރިވަރުން ޖުމްލަ 180 ދުވަހު ކިޔަވާނެ އެވެ.
ރާއްޖޭގައި ކުރިން ދިރާސީ އަހަރު ފަށަމުން އައީ ކޮންމެ އަހަރެއްގެ ޖެނުއަރީގައި ނަމަވެސް ކޮވިޑުގެ ހާލަތާ ގުޅިގެން، ދިރާސީ އާ އަހަރުގެ ކިޔެވުން ފެށުން އޮގަސްޓަށް ބަދަލު ކުރިއެވެ. އެ ބަދަލާއެކު، ބޮޑު ޗުއްޓީ ހުޅަނގު މޫސުމުގެ އެންމެ ގަދައަށް ވިއްސާރަކުރާ ޖޫން/ޖުލައިގައި ލިބޭތީ ބެލެނިވެރިންގެ ހުރި ކަންބޮޑުވުމާ އެކު، ރައީސް ޑރ. މުހައްމަދު މުއިއްޒު ވަނީ ދިރާސީ އާ އަހަރުގެ ކިޔެވުން ކުރިން އޮތް ގޮތަށް ޖެނުއަރީގައި ފަށައި ޑިސެމްބަރަށް ބަންދު ލިބޭ ގޮތް ބަދަލުކޮށްދެއްވައިފައެވެ. އެ ބަދަލާއެކު އަންނަ އަހަރުން ފެށިގެން ދިރާސީ އާ އަހަރު ފެށޭނީ ޖެނުއަރީ މަހުގެ ތެރޭގައެވެ.
އެޑިއުކޭޝަން މިނިސްޓްރީން ބުނި ގޮތުގައި 2026 ވަނަ އަހަރުގެ ދިރާސީ އާ އަހަރުގެ ކިޔެވުން ފަށާނީ ޖެނުއަރީ 27 ވަނަ ދުވަހު އެވެ.
