އިއްޔެ ރާއްޖެއަށް ކުރި ވިއްސާރައިގައި އެންމެ ގިނައިން ވާރޭ ވެހުނީ މެދުރާއްޖެ ތެރެއަށް ކަމަށް މޫސުމާއި ބެހޭ ގައުމީ އިދާރާ (މެޓް އޮފީސް) އިން ހާމަކޮށްފިއެވެ.
އިއްޔެ މެންދުރުފަހު މެދުނުކެނޑި ފަސްގަޑި އިރަށް ވުރެ ގިނައިން ރާއްޖޭގެ އެކި ހިސާބުތަކަށް ވާރޭ ވެހިފައިވާކަމަށް މެޓް އޮފީހުން ރިޕޯޓުކޮށްފައި ވެއެވެ.
މެޓުން ބުނީ ވޭތުވެދިޔަ 24 ގަޑިއިރަށް ބަލާއިރު ރާއްޖެއަށް އެންމެ ގިނައިން ވާރޭ ވެހުނީ މެދު ރާއްޖެ ތެރެއަށެވެ. އެގޮތުން އއ. ތޮއްޑޫގެ އޮޓަމެޓިކް ވެދަރ ސްޓޭޝަންއިން 147މމ ރިކޯޑު ކުރެވިފައިވާއިރު މާލެއަށް 139 މިލިމީޓަރުގެ ވާރޭ ވެހުނުކަމަށް މެޓް އޮފީހުން ބުނެއެވެ.
ވޭތުވެދިޔަ 24 ގަޑިއިރުތެރޭގައި ވާރޭ ރެކޯޑުކުރެވިފައިވާ ރާށްތަކަށް ބަލާއިރު، އެންމެ ބޯކޮށް ވެހިފައިވަނީ މެދުރާއްޖެ ސަރަހައްދަށެވެ. އެގޮތުން އއ. ތޮއްޑޫގެ އޮޓަމެޓިކް ވެދަރ ސްޓޭޝަންއިން 147މމ ރިކޯޑުކުރެވިފައިވެއެވެ. pic.twitter.com/rAkXHCokcn
— Maldives Meteorology (@MetMaldives) July 18, 2022
މިއަދުވެސް ރާއްޖޭގެ ބޮޑުބަޔަކަށް ވިއްސާރަކުރާނެކަމަށާއި ޚާއްސަކޮށް އުތުރާއި މެދުރާއްޖެތެރޭގެ އަތޮޅުތަކަށް ބޮޑަށް ވިއްސާރަކުރާނެކަމަށް ލަފާކުރެވޭކަމުގައި މެޓް އޮފީހުން ބުނެއެވެ. އަދި އަންނަ ހުކުރު ދުވަހާހަމައަށް ރާއްޖޭގެ ބޮޑުބަޔަކަށް ވަރަށްބޮޑަށް ވިއްސާރަ ކުރާނެކަމަށް ލަފާކުރެވޭތީ މޫސުމަށް ސަމާލުވުމަށް މެޓް އޮފީހުން އިލްތިމާސްކުރައްވައެވެ.
