ގްރޭޑް އެކެއްގެ ދަރިވަރުންގެ ގުރުއާން ޓެކްސްޓް ފޮތްތަކުގައި ހިމެނޭ ދެ ސޫރަތެއްގެ އާޔަތްތަކެއް އެއްވެފައިވާ މައްސަލައެއް ފެންމަތިވެ އެކަން އެޑިޔުކޭޝަން މިނިސްޓްރީގެ ސަމާލުކަމަށް އަތުވެއްޖެ އެވެ.
އެޑިޔުކޭޝަން މިނިސްޓްރީން ބުނީ ގްރޭޑް އެކެއްގެ ގުރުއާން ފޮތުގައި އޮޅުމެއް އޮތްކަން ފާހަގަކުރެވިފައިވާ ކަމަށާއި އެކަން ބަލަމުން އަންނަ ކަމަށެވެ.
ގްރޭޑު އެކެއްގެ ދަރިވަރުންގެ ގުރުއާން ފޮތުގެ 64ވަނަ ސަފްހާގައި އޮތް ސޫރަތުލް ނަބާގެ 24ވަނަ އާޔަތުގެ މެދު ތެރެއިން ފެށިގެން ވަނީ ނުބައިކޮށް ލިޔެވިފައެވެ. އެ ހިސާބުން ފަށައިގެން ނަބާ ސޫރަތުގެ 31ވަނަ އާޔަތާ ހަމައަށް ވަނީ ނާޒިއަތު ސޫރަތުގެ އަށްވަނަ އާޔަތުން 14ވަނަ އާޔަތާ ހަމައަށެވެ.
އެހެންކަމުން އެ ސޫރަތުގައި މެދުތެރެއަކުން ވަނީ ނާޒިޢާތު ސޫރަތުގެ އާޔަތްތަކެއް އައިސް އޮޅިފައެވެ.
އެޑިޔުކޭޝަނުން މިއަދު ކުރި އިއުލާނެއްގައި ބުނީ ގްރޭޑް އެކެއްގެ ގުރުއާން މާއްދާގެ ދަރިވަރުންގެ ފޮތް ޗާޕްކުރި އިރު ދެ ސޫރަތެއްގެ އާޔަތްތައް އެކުވެފައިވާކަން ފާހަގަވެފައިވާ ކަމަށެވެ. އެކަން ފާހަގަވި ހިސާބުން އެ މައްސަލަ ހައްލުކުރަން ނެޝަނަލް އިންސްޓްޓިއުޓް އޮފް އެޑިއުކޭޝަން (އެންއައިއީ) އިން މަސަައްކަތް ފަށާފައިވާ ކަމަށް ވެސް އެ އިއުލާނުގައި ބުންޏެވެ.
މިކަމާ ގުޅިގެން އާއްމު ބައެއް ފަރާތް ތަކުންވެސް އަންނަނީ މީސްމީޑިއާގައި ނުރުހުން ފާޅު ކުރަމުންނެވެ.
އެގޮތުން ކުރީގެ އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވެސް ވަނީ މި މައްސަލަ ފާހަގަ ކުރައްވައި، މިއީ ވަރަށް އަވަހަށް ރަނގަޅު ކުރުން މުހިންމު ކަމެއް ކަމުގައި ވިދާޅުވެފައެވެ.
“ތިކަމާ ގުޅުން ހުރި ޑިޕާޓްމަންޓުން ތިކަން ބަލަމުން އެދަނީ. ޕްރިންޓް ކުރުމުގައި ލޭއައުޓަށް ދިމާވި މައްސަލައެއްތޯ. ބައެއް ފަހަރަށް އެގޮތަށް ލޭއައުޓުގައި ހުރެފާނެ މައްސަލަ. އެހެންކަމުން އަޅުގަނޑުމެން ދޭނީ ގައިޑެންސް ސުކޫލްތަކަށް ކަންކުރަންވީ ގޮތުގެ” އެޑިޔުކޭޝަން މިނިސްޓްރީގެ އޮފިޝަލަކު ވިދާޅުވިއެވެ.
