ރާއްޖެއާއި ޢަރަބި އިސްލާމީ އެއްވެސް ގައުމަކަށް ޝައްވާލު މަހުގެ ހަނދު މިއަދު ނުފެންނާތީ، މާދަމާއަކީ ރޯދަމަހުގެ 30 ވަނަ ދުވަސް ކަމަށް އިސްލާމީ ކަންތައްތަކާ ބެހޭ ވުޒާރާއިން މިއަދު އިއުލާނުކޮށްފިއެވެ.
ޝައްވާލު މަހުގެ ހަނދު ސާބިތުކުރުމަށްޓަކައި މިރޭ އިސްލާމިކް މިނިސްޓްރީގައި ބޭއްވި ޖަލްސާގައި، މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ނެރުއްވި ބަޔާނުގައިވަނީ، 1447 ވަނަ އަހަރުގެ ޝައްވާލު މަހުގެ ހަނދު ރާއްޖޭގެ އެއްވެސް ހިސާބަކަށް ފެނިފައިނުވާ ކަމަށެވެ. އަދި އިތުބާރުހުރި ފަލަކީ ހިސާބުތަކުން ދައްކާގޮތުގައި މިއަދުގެ އިރުއޮއްސޭއިރު ރާއްޖޭގެ އެއްވެސް ސަރަޙައްދަކަށް ހަނދު ފެންމަތީގައި ނުހުންނާނެތީއާއި، އިސްލާމީ އެއްވެސް ޤައުމަކަށް ހަނދު ފެނުނުކަމުގެ ރަސްމީ މަޢުލޫމާތު ލިބިފައިނުވާތީ، ރާއްޖޭގައި ހަނދު ސާބިތުކުރުމަށް ކަނޑައަޅާފައިވާ އުސޫލުގެ މަތިން މާދަމާއަކީ ރަމަޟާން މަހުގެ 30 ވަނަ ދުވަސް ކަމުގައި ވަނީ ކަނޑައަޅާފައެވެ. އެހެންކަމުން މިއަހަރުގެ ފިޠުރު ޢީދު ދުވަހަކީ ކުރިއަށް އޮތް ހުކުރު ދުވަސް ކަމުގައި އެ ބަޔާނުގައި އިޢުލާނުކުރައްވާފައިވެއެވެ.
ފާހަގަކޮށްލެވޭ ގޮތުގައި، މި ސަރުކާރުން ވަނީ ރޯދަމަހުގެ ފަހު 10 ސަރުކާރު ބަންދުކުރަން ފަށާފައެވެ. އެހެންވެ، ރޯދަމަހުގެ ފަހު 10 އާ އެކު ކުޑަ ޢީދަށް ބޮޑު ބަންދެއް ލިބެއެވެ.
ސަރުކާރު ހުޅުވޭނީ މި މާރިޗު މަހުގެ 22 ވާ އާދިއްތަ ދުވަހެވެ.
